Telegram асосчиси Павел Дуров Apple ҳеч қандай изоҳсиз мессенжернинг янги версиясини чиқаришни икки ҳафтага кечиктираётганини айтди. Бу ҳақда у ўз Telegram каналида маълум қилди.
Бизнинг ҳафсалани пир қилган ягона нарса шундаки, биз тез-тез технология монополистларининг мобил иловаларни кўриб чиқишлари туфайли Telegram’нинг янги версияларини чиқара олмай қоламиз. Масалан, одамларнинг хабарлар орқали ўзини ифода этишида инқилоб қиладиган сўнгги янгиланишимиз икки ҳафта давомида кечиктирилмоқда. Apple томонидан ҳеч қандай сабаблар ва изоҳларсиз, — деб ёзди Дуров.
Тадбиркор дунёнинг энг оммабоп иловалари ўнталигига кирувчи Telegram’га шундай муносабат бўладиган бўлса, кичикроқ илова ишлаб чиқувчилари қандай қийинчиликларни бошдан кечираётганини тасаввур қилиш мумкинлигини айтди.
Бу шунчаки руҳий тушкунлик эмас: бу дунёдаги юз минглаб мобил иловалар учун тўғридан-тўғри молиявий йўқотишларга олиб келади, — деди у.
Telegram асосчисининг таъкидлашича, Европа Иттифоқи ва бошқа мамлакатлардаги тартибга солиш органлари аллақачон иловалар ишлаб чиқувчилардан 30 фоиз комиссия оладиган Apple ва Google’нинг ушбу «ёмон амалиётлари»га эътибор беришни бошлаган.
Аммо Apple технология саноатига етказган иқтисодий зарарни қайтариб бўлмайди, — дея хулоса қилди у.
Дуров технология гигантларининг ишини бир неча бор танқид қилган. Шундай қилиб, аввалроқ у иловалар дўконларининг ишлаб чиқарувчилардан олинадиган 30 фоиз комиссияси ҳақида шикоят қилган ва Apple хизматлари фойдаланувчиларни компаниянинг «рақамли қуллари»га айлантиришини, чунки улар танлаш ҳуқуқини чеклашини айтган эди.
Аввалроқ Telegram асосчиси Павел Дуров БАА фуқаролигини олгани ҳақида хабар берилган эди.
Изоҳ (0)