Ўзбекистонда охирги беш йилда хорижий капитал иштирокида фаолият кўрсатаётган корхоналар сони 2,8 баробарга ошди. Бу ҳақда Давлат статистика қўмитаси хабар бермоқда.
Айни пайтда Ўзбекистонда 14,5 мингта чет эл компаниялари мавжуд. Бунда:
- қўшма корхоналар — 6 267 та;
- хорижий корхоналар — 8 279 та.
Етакчи ўринни 2 705 та корхонада тўлиқ ёки қисман улуши мавжуд бўлган Россия эгаллаган.
Бу Ўзбекистонда хорижий капитал иштирокида фаолият кўрсатаётган корхоналар умумий сонининг 18,6 фоиз улушини ташкил этади.
Бу борада иккинчи ўринни Туркия (2 050 та) эгаллаб турган бўлса, учинчи ўринда Хитой (2 036 та) қайд этилган.
Шунингдек, Ўзбекистон иқтисодиётига ўз капиталини киритаётган Қозоғистон (1 182 та) ва Жанубий Корея (906 та) давлатлари ҳам етакчилар ҳисобланади.
Йил бошидан бери 1 530 та янги компаниялар ташкил қилинган.
2022 йил январь—июль ойларида янги ташкил этилган корхона ва ташкилотлар сони 2017 йилнинг мос даври билан солиштирилганда 3,7 баробарга ошган.
Бунга нима сабаб бўлмоқда?
Биринчи навбатда Россия компаниялари сонининг кўпайиши.
Бу Украинада уруш бошлангандан кейин кўплаб россиялик тадбиркорлар Россияни тарк этиш, ўз бизнесларини бошқа давлатларга кўчиришга қарор қилганликлари билан изоҳланади.
Туркиядаги иқтисодий вазият ҳам янги компаниялар сонини кескин ошишига сабаб бўлмоқда.
2021 йилда Ўзбекистонда турк капитали иштирокида 407 янги корхона ташкил қилинди ва биринчи ўринни эгаллади. Иккинчи ўринда Россия (356 корхона), учинчи ўринда Хитой (266) қайд этилган.
Туркия иқтисодиёти сўнгги йилларда иқтисодий инқироз туфайли қийинчиликларни бошдан кечирмоқда. Турк тадбиркорлари халқаро бозорларга чиқиш орқали буни қоплашга ҳаракат қилмоқда.
Яқинда Туркияда инфляция деярли 80 фоизгача кўтарилди.
Изоҳ (0)