Qrimning Saki tumanidagi Novofedorovka qishlog‘i yaqinida joylashgan Saki aerodromida o‘q-dorilar portlab ketishi oqibatida jabrlanganlar soni 13 kishiga yetdi, deb yozadi “RBK” mintaqa Sog‘liqni saqlash vazirligiga tayanib.
Saki tuman kasalxonasida o‘n nafar jabrlanuvchiga, shu jumladan, ikki nafar bolaga tibbiy yordam ko‘rsatilgan, ularning barchasi yengil darajali shikastlanishlar olgan. Bir bemor kasalxonada qolgan.
Yana ikki kishi avvalroq Simferopolda tez yordam kasalxonasiga tibbiy yordam so‘rab murojaat qilgan, zarur ko‘mak berilganidan keyin, ular uylariga yuborilgan.
9-avgust kuni Saki kurorti hududidagi Novofedorovka qishlog‘i yaqinida ketma-ket portlashlar sodir bo‘lgandi. Qishloqning sharqiy chekkasida, turar-joy zonasidan tashqarida harbiy aerodrom joylashgan. Mudofaa vazirligi hodisani aviatsiya o‘q-dorilari portlab ketishi bilan izohladi. “Interfaks” va “RIA Novosti”ning harbiy idoradagi manbalariga ko‘ra, o‘q-dorilar portlab ketishiga yong‘in xavfsizligi qoidalarining buzilishi sabab bo‘lgan.
Portlashlar oqibatida bir kishi halok bo‘ldi, deb ma’lum qildi Qrim rahbari Sergey Aksenov. Uning aniqlik kiritishicha, Novofedorovka hududida xavfsizlik choralari kuchaytirilgan va obyetkdan 5 km masofada qurshov o‘rnatilgan. Qrim rahbari maslahatchisi Oleg Kryuchkov yarim orolda favqulodda holat kiritilganini rad etdi, ammo terrorchilik xavfining yuqori darajasi 24-avgustga qadar uzaytirildi.
Saki fuqarolaridan biri “RBK”ga ma’lum qilishicha, yetti marta “juda kuchli portlash” ovozlari eshitilgan, evakuatsiya faqat korxona hududidan amalga oshirilgan. Yana bir fuqaroning aytishicha, u kamida 15 ta portlash ovozini aniq eshitgan. Guvohlar ma’lum qilishicha, portlash to‘lqinidan binolarning oynalari parchalanib ketgan. Portlashlardan biri oqibatida esa hatto to‘qqiz qavatli turar joy binosi tebranib ketgan.
Izoh (0)