Xorazm viloyatining Bog‘ot tumanida Nexia-2 va YPX inspektori Lacetti xizmat avtomashinasi ishtirokida YTH yuz berdi. Bu haqda viloyat prokuraturasi matbuot xizmati xabar berdi.
Aniqlanishicha, 8-avgust kuni soat 00:10 larda Bog‘ot tumani, “Nayman” mahallasida yashovchi fuqaro M.A. Nexia-2 ni haydab ketayotib, tumanning O‘zbekiston va Feruz ko‘chalari tutashgan chorrahada avtomashinasining old o‘ng tomon burchagi bilan viloyat IIB JXX YHXB 4-safarbar guruhi YPX inspektori E.R. boshqaruvidagi Lacetti xizmat avtomashinasi old chap tomon burchagiga urib, to‘qnashgan.
Yo‘l transport hodisasida hech kim tan jarohati olmagan. Hodisa sodir bo‘lgan joy Bog‘ot tuman prokuraturasi tergovchisi rahbarligidagi tergov–tezkor guruhi tomonidan ko‘zdan kechirilgan.
Dastlabki tibbiy ko‘rikda (alkotestrda) fuqaro M.A.ning mastligi aniqlangan bo‘lsa, YPX inspektorida mastlik holati qayd etilmagan. Holat yuzasidan sud–tibbiy, sud-kimyoviy, sud-avtotexnika va sud–trasologik ekspertizalari tayinlangan.
Xabarda ta’kidlanishicha, hozirda YTHning batafsil tafsilotlarini aniqlash yuzasidan Bog‘ot tuman prokuraturasi tomonidan tergovga qadar tekshiruv harakatlari olib borilmoqda. Holat viloyat prokuraturasi tomonidan nazoratga olingan.
Avvalroq Namangan viloyati Davlatobod tumanida ham shu kabi YTH yuz bergandi. YPX inspektoriga biriktirilgan Lacetti xizmat avtomashinasi o‘zi bilan bir yo‘nalishda harakatlanib kelayotgan Nexia o‘ng yon tomoniga borib urilgan.
Mavzuga doir:
Izoh (0)