2022 йил 4 август куни Ўзбекистон ташқи ишлар вазири в.б. Владимир Норов Кўрфаз араб давлатлари ҳамкорлик кенгаши бош котиби Наиф ал-Ҳажраф билан учрашди.
Учрашувда сўнгги йилларда Ўзбекистон билан Кўрфаз араб давлатлари ҳамкорлик кенгаши ва унга аъзо мамлакатлар ўртасидаги муносабатлар сезиларли даражада фаоллашиб, янги амалий мазмун билан бойиб бораётгани таъкидланди.
Илгари эришилган келишувлар, жумладан, 2021 йилда имзоланган Ўзбекистон Ташқи ишлар вазирлиги ва Кўрфаз араб давлатлари ҳамкорлик кенгаши Бош котибияти ўртасида ўзаро маслаҳатлашувлар механизми бўйича Англашув меморандуми доирасидаги келишувларни амалга оширишнинг бориши кўриб чиқилди.
Н.Ҳажраф Кўрфаз араб давлатлари ҳамкорлик кенгаши Ўзбекистонни минтақадаги асосий давлатлардан бири деб билишини ҳамда мамлакатда амалга оширилаётган ислоҳотларни юксак баҳолашини таъкидлади. Кенгашнинг Ўзбекистон билан ҳамкорлик қилишида мавжуд улкан салоҳиятдан янада самарали фойдаланиш ҳамда томонларни қизиқтирган барча соҳаларда алоқаларни йўлга қўйиш бўйича чора-тадбирлар кўришга тайёрлиги таъкидланди.
Бўлажак тадбирлар жадвали юзасидан фикр алмашилди. Икки минтақа ўртасидаги алоқаларни мустаҳкамлашга хизмат қиладиган Марказий Осиё – Кўрфаз араб давлатлари ҳамкорлик кенгаши стратегик мулоқотининг 2022 йилдаги биринчи йиғилишига тайёргарлик кўришга алоҳида эътибор қаратилди.
Халқаро ва минтақавий долзарб масалалар, жумладан, Афғонистондаги вазият муҳокама қилинди. Кўрфаз араб давлатлари ҳамкорлик кенгаши бош котиби яқинда Тошкентда бўлиб ўтган Афғонистон бўйича халқаро конференция якунларини ижобий баҳолади. Ўзбекистон томонидан ушбу мамлакатга ижтимоий-иқтисодий ва гуманитар ёрдам кўрсатиш борасида амалга оширилаётган амалий ишлар муҳимлиги қайд этилди.
Изоҳ (0)