Respublika epidemiologiya, mikrobiologiya, yuqumli va parazitar kasalliklar ilmiy-amaliy tibbiyot markazida Yaponiya hukumati tomonidan Sog‘liqni saqlash vazirligiga zamonaviy kompyuter tomografiyasi uskunalari hamda maxsus jihozlangan tibbiy konteynerni topshirishga bag‘ishlangan marosim bo‘lib o‘tdi. Bu haqda SSV xabar berdi.
Qayd etilishicha, shu munosabat bilan o‘tkazilgan tantanali tadbirda SSV vaziri Behzod Musayev, Yaponiya parlamentining vakillar palatasi a’zosi Keidzi Furuya, Yaponiyaning O‘zbekistondagi favqulodda va muxtor elchisi Yoshinori Fudziyama ishtirok etgan.
2020-yil mart oyida O‘zbekiston sog‘liqni saqlash tizimini qo‘llab-quvvatlash maqsadida ushbu davlat tomonidan 500 million iyena ajratilgan. Mazkur mablag‘ hisobiga dastlab Yaponiyada ishlab chiqarilgan virusga qarshi samarali dori vositalari, keyinchalik Yaponiya xalqaro hamkorlik agentligi (JICA) tomonidan mamlakatimiz tibbiyot muassasalariga yuqori texnologik rentgen apparatlari olib kelib o‘rnatilgan.
Bu gal ushbu grant loyihasi hisobidan mamlakatdagi 3 ta tibbiyot muassasasiga Aquilion Prime SP 160 KT kompyuter tomografiyasi uskunalari hamda 1 dona maxsus jihozlangan SANSEI tibbiy-diagnostika konteyneri topshirildi.
Rejaga muvofiq, zamonaviy kompyuter tomografiyasi qurilmalari Respublika shoshilinch tibbiy yordam ilmiy markazi, Respublika epidemiologiya, mikrobiologiya, yuqumli va parazitar kasalliklar ilmiy-amaliy tibbiyot markazi hamda Buxoro davlat tibbiyot instituti klinikasiga taqdim etilgan. Tibbiy diagnostika konteyneri esa yurtimizning olis hududlarida yashovchi aholiga sifatli tibbiy xizmat ko‘rsatish maqsadida Respublika shoshilinch tibbiy yordam ilmiy markaziga topshirilgan.
Ushbu kompyuter tomografiyasining o‘ziga xos afzalliklari shundaki, u orqali bemorlarni har qanday tekshiruvdan o‘tkazish mumkin. Qolaversa, ushbu uskunaning boshqarish opsiyasi minimal radiatsiya ta’sirida yuqori sifatli tasvirlarni olish imkonini beradi.
Bundan tashqari, SANSEI tibbiy-diagnostika konteyneri oflayn rejimda ishlovchi mustaqil mobil diagnostika jamlanmasi bo‘lib, u kompyuter tomografiyasi, ultratovush diagnostika hamda rentgen apparatlari bilan jihozlangan.
Tadbirda mazkur zamonaviy uskunalar bemorlarga o‘z vaqtida aniq tashxis qo‘yishga xizmat qilishi, shuningdek, soha xodimlariga katta qulaylik yaratishi alohida ta’kidlangan.
Izoh (0)