“O‘zbekiston temir yo‘llari” aksiyadorlik jamiyatida O‘zbekiston temir yo‘l boshqarmasi vakillarining “Transmashholding”AJ Rossiya delegatsiyasi bilan uchrashuvi bo‘lib o‘tdi.
Uchrashuvda “O‘zbekiston temir yo‘llari” va “Transmashholding” AJ hamkorligi 20 yildan ortiq vaqt mobaynida davom etib kelayotgani ta’kidlandi. Tadbirda ishtirokchilar o‘zaro hamkorlik va yirik loyihalarni amalga oshirish natijalari bilan tanishdi. Ma’lum qilinishicha, Rossiya kompaniyasining ishlab chiqarish korxonalari Toshkent metrosi uchun jami 122,2 million AQSH dollarilik yettita (3ES5K) seriyali magistral yuk elektrovozlari va 45 ta metro vagonlari yetkazib bergan.
Uchrashuvda “O‘zbekiston temir yo‘llari” AJ boshqaruv raisi vazifasini bajaruvchisi Xusnutdin Xasilov “Transmashholding” AJ O‘zbekiston Respublikasida 12 tadan ortiq loyihalarni amalga oshirishda faol ishtirok etganini aytdi.
“2017-yildan boshlab hisoblaganda “O‘zbekiston temir yo‘llari” AJ “Transmashholding” AJ bilan hamkorlikda yettita yirik loyihani amalga oshirdi. Xususan, Toshkent shahrida “Transmashholding” AJning umumiy qiymati 209 million AQSH dollari bo‘lgan xususiy kapitali hisobidan yuqori sifatli spirtli ichimliklar ishlab chiqarish zavodi qurildi. Shuningdek, poytaxtda joylashgan “Navro‘z” bog‘ida ko‘prik bunyod etildi. Shaharda ko‘p tarmoqli klinikaning qurilishi tugallandi. Joriy yilda “Toshkent-Sharqiy” aerodromida yoqilg‘i kompleksi (TZK) ham ish boshladi. Yuqoridagi loyihalarni amalga oshirish doirasida qo‘shma tashkilotlar tashkil etildi”, – dedi aksiyadorlik jamiyati rahbari.
Ta’kidlanishicha, “Transmashholding” AJ vakillari “O‘zbekiston temir yo‘llari” AJni modernizatsiya qilish bo‘yicha tavsiyalar ishlab chiqishda ham faol ishtirok etgan.
Uchrashuv doirasida O‘zbekiston temir yo‘l sanoatini faol qo‘llab-quvvatlash va rivojlantirish uchun Rossiya delegatsiyasi a’zolari Sergey Ivanov, Zafar Muxamedov va Nikolay Yemelyanovga minnatdorlik xatlari taqdim etildi. Xusnutdin Xasilov va “O‘zbekiston temir yo‘llari” AJ tarkibiy bo‘linmalari rahbarlari ishtirokchilarni qutladi.
Ma’lumot sheriklik huquqi asosida tayyorlandi
Izoh (0)