2021-yilda O‘zbekistondagi jami sanoat korxonalaridan atmosferaga 909 ming tonna tashlanmalar tashlangan. Bu haqda AOKAda o‘tkazilgan brifingda Ekologiya va atrof-muhitni muhofaza qilish davlat qo‘mitasi boshqarma boshlig‘i Aziz Kalimbetov ma’lum qildi.
Bu ko‘rsatkich 2019-yilga nisbatan 43,8 ming (4,6 foiz) hamda 2020-yilga nisbatan 15,4 ming (2 foiz) tonnaga kamayganini ko‘rish mumkin.
Tashlamalar kamayishiga ta’sir ko‘rsatayotgan asosiy omillar: korxona va tashkilotlarda “yashil” texnologiyalarga bosqichma-bosqich o‘tish, kamchiqitli texnologiyalarning qo‘llanilishi, turg‘un tashlama manbalariga o‘rnatilgan chang-gaz tozalash uskunalarining doimiy modernizatsiya qilinishi.
2022-yil boshidan 400 ga yaqin yirik sanoat korxonasining 1500 ga yaqin chang-gaz tozalash uskunasi xatlovdan o‘tkazilib, shundan 270 ta korxonaning 1000 dan ortiq uskunasini modernizatsiya qilish va yangisiga almashtirish taqozo etilishi ma’lum bo‘ldi. Shu sababdan, 2022–2023-yillarga mo‘ljallangan chora tadbirlar dasturi ishlab chiqilib Vazirlar Mahkamasi tomonidan joriy yilning mart oyida tasdiqlanib, ijroga qaratildi.
Bunda, har bir sanoat korxonalarining chang-gaz tozalash samaradorligi hozirgi 75–80 foizdan 95 va 99,5 foizga yetkaziladi va buning evaziga atmosferaga yillik tashlanayotgan 15 ming tonnadan ortiq zararli gazlar kamayishiga erishiladi.
O‘tgan davr mobaynida 30 ta sanoat korxonasida umumiy 114 ta chang-gazlarni tutib qolish uskunalarini ta’mirlash va yangilariga almashtirish ta’minlandi.
Izoh (0)