2021 йилда Ўзбекистондаги жами саноат корхоналаридан атмосферага 909 минг тонна ташланмалар ташланган. Бу ҳақда АОКАда ўтказилган брифингда Экология ва атроф-муҳитни муҳофаза қилиш давлат қўмитаси бошқарма бошлиғи Азиз Калимбетов маълум қилди.
Бу кўрсаткич 2019 йилга нисбатан 43,8 минг (4,6 фоиз) ҳамда 2020 йилга нисбатан 15,4 минг (2 фоиз) тоннага камайганини кўриш мумкин.
Ташламалар камайишига таъсир кўрсатаётган асосий омиллар: корхона ва ташкилотларда «яшил» технологияларга босқичма-босқич ўтиш, камчиқитли технологияларнинг қўлланилиши, турғун ташлама манбаларига ўрнатилган чанг-газ тозалаш ускуналарининг доимий модернизация қилиниши.
2022 йил бошидан 400 га яқин йирик саноат корхонасининг 1500 га яқин чанг-газ тозалаш ускунаси хатловдан ўтказилиб, шундан 270 та корхонанинг 1000 дан ортиқ ускунасини модернизация қилиш ва янгисига алмаштириш тақозо этилиши маълум бўлди. Шу сабабдан, 2022–2023 йилларга мўлжалланган чора тадбирлар дастури ишлаб чиқилиб Вазирлар Маҳкамаси томонидан жорий йилнинг март ойида тасдиқланиб, ижрога қаратилди.
Бунда, ҳар бир саноат корхоналарининг чанг-газ тозалаш самарадорлиги ҳозирги 75–80 фоиздан 95 ва 99,5 фоизга етказилади ва бунинг эвазига атмосферага йиллик ташланаётган 15 минг тоннадан ортиқ зарарли газлар камайишига эришилади.
Ўтган давр мобайнида 30 та саноат корхонасида умумий 114 та чанг-газларни тутиб қолиш ускуналарини таъмирлаш ва янгиларига алмаштириш таъминланди.
Изоҳ (0)