Роналду олдида иккита йўл бор: «Атлетико»га ўтиш ёки «Манчестер Юнайтед»да қолиш

Криштиану Роналду фаолиятини давом эттириши учун иккита вариант мавжуд.

Португалиялик футболчи «Манчестер Юнайтед»дан ўзини трансферга қўйишини талаб қилмоқда — у учун энг маъқул вариант Чемпионлар Лигасида ўйнайдиган клубга ўтиш.

L’Equipe нашри хабарига кўра, Роналду Саудия Арабистони клуби томонидан таклиф қилинган катта маошли шартномани рад этган. Маҳаллий клублардан бири манкунианликларга трансфер учун 30 миллион евро, яна 20 миллион евро футболчининг агентига комиссия сифатида, шунингдек, 2 йиллик шартнома учун 250 миллион евро маош таклиф қилган.

Ундан ташқари «Спортинг» ҳам Роналдуга қизиқиш билдираётгани, аммо Португалия клуби таклифи ҳам рад этилгани хабар қилинди.

Шу тариқа 37 ёшли ҳужумчи фаолиятини давом эттириши учун иккита вариант қолди — ё «Атлетико»га ўтиш, ёки «Манчестер Юнайтед»да қолиш. Мадрид жамоаси Роналдуни ўз сафига қўшиб олмоқчи ва унинг талабларини қондира олишига кўзи етмоқда.

Қайд этилганидек, португалияликнинг «қизил иблислар» сафида қолиш эҳтимоли паст. Агент Жорже Мендеш ҳам мижозининг кетишини истамоқда. Унинг фикрича, Роналдуга Чемпионлар Лигасида ўйнайдиган клуб топилмаётгани, футболчининг обрўсига путур етказади.