Andijonda 5,5 gektar yerni 150 mln so‘mga sotmoqchi bo‘lganlar ushlandi

Andijon viloyatida 5,5 gektar yerni 150 mln so‘mga sotmoqchi bo‘lgan shaxs qo‘lga olindi.

2022-yil 13-iyul kuni Andijon viloyati prokuraturasi Yer resurslari talon-toroj qilinishining oldini olish bo‘limi hamda Andijon viloyati IIB JQB Yer resurslarini talon-toroj qilinishiga qarshi kurashish bo‘linmasi xodimlari tomonidan fuqaro I.M.ning arizasiga asosan tezkor tadbir o‘tkazilgan.

Tadbir davomida Andijon tajriba maydoni MCHJ marketing bo‘limi mutaxassisi vazifasida ishlovchi Q.N. o‘zining jinoiy sherigi Andijon tajriba ko‘rgazma maydoni MCHJ direktori vazifasida ishlovchi X.A. bilan oldindan jinoiy til biriktirib, Marhamat tumani “Toza havo” nomli sanatoriysi oldida joylashgan 5,5 gektar yer maydonini firibgarlik yo‘li bilan sotmoqchi bo‘lib, ariza muallifidan oldindan kelishilgan 150 million so‘m miqdoridagi pullarni olgan vaqtida tadbir ishtirokchilari tomonidan ashyoviy dalillar bilan qo‘lga olingan.

Mazkur holat yuzasidan Marhamat tumani IIB huzuridagi tergov guruhi tomonidan O‘zbekiston Respublikasi Jinoyat kodeksining 168-moddasi 4-qism “a” bandi bilan jinoyat ishi qo‘zg‘atilgan va fuqarolar X.A. va Q.N. gumon qilinuvchi tariqasida ishtirok etishga jalb qilinib, O‘zbekiston Respublikasi Jinoyat-protsessual kodeksining 221-moddasi tartibida ushlandi.

Hozirda ushbu holat yuzasidan dastlabki tergov harakatlari olib borilmoqda.