Андижонда 5,5 гектар ерни 150 млн сўмга сотмоқчи бўлганлар ушланди

Андижон вилоятида 5,5 гектар ерни 150 млн сўмга сотмоқчи бўлган шахс қўлга олинди.

2022 йил 13 июль куни Андижон вилояти прокуратураси Ер ресурслари талон-торож қилинишининг олдини олиш бўлими ҳамда Андижон вилояти ИИБ ЖҚБ Ер ресурсларини талон-торож қилинишига қарши курашиш бўлинмаси ходимлари томонидан фуқаро И.М.нинг аризасига асосан тезкор тадбир ўтказилган.

Тадбир давомида Андижон тажриба майдони МЧЖ маркетинг бўлими мутахассиси вазифасида ишловчи Қ.Н. ўзининг жиноий шериги Андижон тажриба кўргазма майдони МЧЖ директори вазифасида ишловчи Х.А. билан олдиндан жиноий тил бириктириб, Марҳамат тумани «Тоза ҳаво» номли санаторийси олдида жойлашган 5,5 гектар ер майдонини фирибгарлик йўли билан сотмоқчи бўлиб, ариза муаллифидан олдиндан келишилган 150 миллион сўм миқдоридаги пулларни олган вақтида тадбир иштирокчилари томонидан ашёвий далиллар билан қўлга олинган.

Мазкур ҳолат юзасидан Марҳамат тумани ИИБ ҳузуридаги тергов гуруҳи томонидан Ўзбекистон Республикаси Жиноят кодексининг 168-моддаси 4-қисм «а» банди билан жиноят иши қўзғатилган ва фуқаролар Х.А. ва Қ.Н. гумон қилинувчи тариқасида иштирок этишга жалб қилиниб, Ўзбекистон Республикаси Жиноят-процессуал кодексининг 221-моддаси тартибида ушланди.

Ҳозирда ушбу ҳолат юзасидан дастлабки тергов ҳаракатлари олиб борилмоқда.