Telegram мессенжеридаги каналларнинг бирида косонлик Барно Аҳмедова номидан «Косон тумани ҳокими обрўсини сақлаш учун барча айбни эрим бўйнига олди, аслида 60 ёшли одамни уриб кетган ва унинг ўлимига сабабчи бўлган ҳайдовчи ҳокимнинг ўғли эди», деган мурожаат тарқатилди. Косон ҳокимлиги ахборот хизмати раҳбари Дилшод Набиев мазкур ахборотни рад этди.
«Мазкур телеграм канал бугун ҳам навбатдаги уйдирмани тўқиб чиқарди. 2020 йилда Косон тумани ҳокимлиги хизмат автомашинасининг ЙТҲга учраши билан боғлиқ воқеалар фонида машинани бошқарган фуқаро Р.Жўраевнинг рафиқаси номидан хабар жойлаштирилиб, эски воқеалар умуман бошқача талқинда ёзиб чиқилди», — дейди Косон ҳокимининг матбуот котиби Дилшод Набиев.
Масъулнинг қўшимча қилишича, Барно Аҳмедова Telegram канал учун ҳеч қандай маълумот бермаган.
«Барно Аҳмедова унинг номидан нотўғри хабарлар чиқарилганини ва бу хабарлар оилавий муносабатларига жиддий таъсир қилганини айтди. Шахсан ўзим мазкур оила аъзолари билан бугун суҳбатда бўлдим. Улар ўз номларини сотиб, интернетга хабар ёзаётган кимсани топишда амалий ёрдам сўрамоқда. Интервьюларни ҳавола қиламан», — дейди Дилшод Набиев.
Қўшимча қилинишича, Барно Аҳмедова унинг номини ёзиб, нотўғри ахборот тарқатган Telegram канали масъуллари устидан тегишли органларга мурожаат қилади.
2021 йилнинг 15 январь куни Косон ҳокими ёки ўғли бошқаргани тахмин қилинган Captiva 60 ёшли фуқарони уриб юборгани, жабрланувчи воқеа жойида вафот этгани хабар берилганди. Кейинчалик ҳоким ЙТҲга учраган машинани алмаштирмоқчилиги маълум бўлди. Мазкур масала юзасидан ОАВ вакиллари учун матбуот анжумани ташкил қилган Асрол Бойқараев ЙТҲга учраган машинани таъмирлаш 276 миллион сўмга тушишини, янги машина харид қилиш эса 260 миллион сўм бўлишини айтиб, ЙТҲга учраган машинасини алмаштириш сабабини айтганди. Шунингдек, ҳоким ўша матбуот анжуманида машинасида ЙТҲ содир этилганида рулда ўзи ёки ўғли бўлгани ҳақидаги фаразларни рад этганди.
Мавзуга доир: Қашқадарёда туман ҳокимининг қамоққа олингани рад этилди
Изоҳ (0)