Navoiyda Nexia’ni six yordamida ochib, olib qochgan yigitlar ushlandi

Navoiy viloyati Konimex tumanida avtomobil olib qochganlar qo‘lga olindi.

Konimex tumani Zafarobod mahallasida yashovchi 18 yoshli R.SH. do‘stlari K.S. va voyaga yetmagan J.J.lar bilan o‘zaro til biriktirgan. Ular 2022-yil 14-iyul kuni tungi soat 01:14 da Konimex tumani “Zafarobod” mahallasida yashovchi 35 yoshli T.B.ning egaligida bo‘lgan Nexia avtomashinasini six yordamida ochib, g‘ayriqonuniy ravishda, hech qanday ruxsatsiz ushbu avtomashinani olib qochib, voqea joyidan yashiringan.

O‘tkazilgan tezkor-qidiruv tadbirlari davomida R.SH. va uning sheriklari Nexia avtomashinasini “Zafarobod” mahallasi Shodlik ko‘chasi hududida boshqarib ketayotgan vaqtida Konimex tumani IIB xodimlari tomonidan ushlangan.

Mazkur holat yuzasidan Konimex tumani IIB huzuridagi Tergov guruhi tomonidan Jinoyat kodeksining 267-moddasi 2-qismi “b” bandi (transport vositasini olib qochish) bilan jinoyat ishi qo‘zg‘atilib, R.SH. va K.S. protsessual tartibda ushlangan.

Hozirda dastlabki tergov harakatlari olib borilmoqda.