Surxondaryoning Termiz shahriga 5-iyul kuni Afg‘oniston tomondan 5 ta snaryad kelib tushgan edi. Ko‘p vaqt o‘tmay Afg‘oniston muvaqqat hukumati bu hujumni uyushtirgan jinoiy guruh qo‘lga olinganini e’lon qildi.
Jinoyatchilarni qo‘lga olish jarayonida Qunduzning Imom Sohib tumanidagi Qanjag‘e hududida Islom Amirligi maxsus bo‘linmalari “Xavorijlar” markazini topib, yo‘q qilgan. Ushbu operatsiya davomida 3 nafar jinoyatchi o‘ldirilgan, besh nafari tiriklayin qo‘lga olingan. Ularning avtomashinalari va qurollari musodara qilingan.
Muvaqqat hukumat tomonidan taqdim etilgan videoda qo‘lgan olingan xavorijiylardan biri haqiqatan ham ular O‘zbekiston tomoniga snaryad uchirganlarini tan olgan.
“Kobuldanmiz, Farruh degan qo‘shnim ham bor edi. Tojikistonni Xo‘javor hududiga ham snaryadlarni biz uchirganmiz. O‘zbekiston va Tojikiston hududiga snaryadlarni uchirishni qarshilik fronti bilan birgalikda amalga oshirdik. Ular bizga snaryadlarni yetkazib berdi. Biz mashinalarga solib, ikkita hududga uchirdik”, — deydi qo‘lga olingan jinoyatchi.
Uning ta’kidlashicha, jinoiy guruh Afg‘onistonning Xayraton hududida joylashgan uylarning birida yana snaryadlarni uchirish uchun tayyorgarlik ko‘rayotgan vaqtlarida “Tolibon” tomonidan qo‘lga olingan.
Eslatib o‘tamiz, Termiz shahriga snaryadlar tushganda portlashlar sodir bo‘lmagan, buning natijasida inson qurbonlari va vayronagarchiliklar kuzatilmagan. To‘rtta xususiy uyga kichik zarar yetgan, beshinchi snaryad futbol maydonidan topilgan. Topilgan snaryadlar sapyor birligi tomonidan zararsizlantirilgan.
Holat yuzasidan siyosatshunos Kamoliddin Rabbimov “Tolibon” Afg‘onistondan O‘zbekistonga snaryad otganlarni qo‘lga olib, jazolashini bildirgani yaxshi yangilik, deya baholagan edi.
Izoh (0)