Shavkat Mirziyoyev 19-iyul kuni O‘zbekistonda amaliy tashrif bilan bo‘lib turgan Eron Islom Respublikasi vitse-prezidenti Sorena Sattoriyni qabul qildi. Bu haqda Prezident matbuot xizmati xabar qildi.
Qayd etilishicha, uchrashuvda O‘zbekiston—Eron munosabatlarini kengaytirish masalalari ko‘rib chiqilgan. Fan, innovatsiya va texnologiyalar sohasida qo‘shma dastur va loyihalarni ilgari surishga alohida e’tibor qaratilgan. Uchrashuv avvalida Sorena Sattoriy davlat rahbariga Eron prezidenti Ibrohim Raisiyning salomini yetkazgan.
Keyingi yillarda ikki tomonlama muloqotlar va o‘zaro almashinuvlarning faollashuvi kuzatilayotgani qayd etilgan. Ta’kidlanishicha, savdo ko‘rsatkichlari va kooperatsiya loyihalari soni ham ortib bormoqda. O‘tgan yili tovar ayirboshlash 73 foizga, joriy yil boshidan esa yana 22 foizga oshgan.
Qo‘shma ilmiy-amaliy tadqiqotlar o‘tkazish borasidagi amaliy hamkorlikni kengaytirish, izlanish ishlari va venchur tashabbuslarini moliyalashtirishga xususiy sektorni jalb qilish, oliy ta’lim muassasalari o‘rtasidagi dasturlarni qo‘llab-quvvatlash, bio va nanotexnologiyalar, IT sohalarida, farmatsevtika va boshqa tarmoqlarda qo‘shma loyihalarni amalga oshirish uchun mavjud imkoniyatlar qayd etilgan.
O‘zbekiston—Eron innovatsiya forumi va ishbilarmonlik tadbirlari doirasida qabul qilinadigan qo‘shma qarorlar va imzolanadigan bitimlarni amalga oshirish bo‘yicha “yo‘l xaritasi”ni qabul qilish yuzasidan kelishuvga erishilgan.
Izoh (0)