Antimonopoliya qo‘mitasi ogohlantirishidan so‘ng Andijonda metan gaz narxlari 1900 so‘mgacha tushdi (video)

Antimonopoliya qo‘mitasi metan gazi narxlarini sun’iy ravishda oshirgan gaz quyish shoxobchalariga chora ko‘rilishini ma’lum qilgach, Andijondagi gaz quyish shоxobchalarida metan gaz narxi 1900 so‘mgacha tushdi. Bu haqda “Daryo” muxbiri Umidjon Mamarasulov xabar berdi.

Vazirlar Mahkamasining 2022-yil 14-iyuldagi qaroriga muvofiq yuridik shaxslar uchun tabiiy gaz va elektroenergiya uchun tariflar oshirilishi vaqtinchalik to‘xtatilgandi. Shunga qaramay, ayrim gaz quyish shoxobchalarida 15-iyuldan boshlab metan gazi narxi oshirilgani haqida xabarlar tarqaldi. Energetika vazirligi holatga munosabat bildirib, hukumat qaroriga ko‘ra, gaz quyish shoxobchalari uchun mahsulotlarni sotish narxlari oshmagani va bir xil darajada saqlanib qolganini metan narxini oshirishning obyektiv sabablari yo‘qligini ma’lum qildi. Shundan so‘ng Monopoliyaga qarshi kurashish qo‘mitasi holat yuzasidan o‘tkazilgan tezkor o‘rganish ishlari natijalarini e’lon qildi.

“Daryo”ning Andijon viloyatidagi muxbiri viloyatdagi gaz quyish shoxobchalarida bo‘lib, bugungi kundagi narxlar bilan qiziqdi.

Aniqlanishicha, Andijon shahrida faoliyat yuritayotgan aksariyat shoxobchalarda 1 kub metr gaz 2500 so‘mdan sotilmoqda.

Andijon—Shahrixon avtomobil yo‘nalishidagi shoxobchalarda esa 2000 so‘mdan 2300 so‘mgacha sotilmoqda. 15-iyul kuni boshqa joylarda narx oshishiga qaramasdan narxni 2300 so‘mgacha tushirib, aksiya o‘tkazishni boshlagan Andijon—Xonobod avtomobil yo‘lida gaz quyish shoxobchalari esa raqobatni kuchaytirgan.

Ushbu shoxobchalardan biri 16-iyul kuni 1 kub metr gaz narxini dastlab 2300 so‘mdan sotgan, qo‘shni shoxobchada esa 2250 so‘mdan sotilgan, 17-iyul kuni esa 2000 so‘mga tushirgan. 2250 so‘mdan gaz sotgan shoxobcha esa 17-iyul kuni 1 kub metr gaz narxini 1990 so‘mdan sota boshlagan.

Ushbu raqobatga qo‘shilgan Jalaquduq tumanidagi shoxobchalardan biri esa narxni 1900 so‘mga tushirib, mijozlarni jalb qilishga kirishgan.

Shoxobchalardagi narxlar tushishi davom etmoqda.