O‘zbekistonda oziq-ovqat ta’minoti bo‘yicha namunali tajriba yaratgan mahalla raislari rag‘batlantiriladi

Shavkat Mirziyoyev 18-iyul kuni o‘tkazilgan videoselektor yig‘ilishida oziq-ovqat ta’minoti bo‘yicha yangicha tizim yaratish kerakligi haqida gapirdi. Bu haqda prezident matbuot kotibi xabar qildi.

Qayd etilishicha, yaratilgan imkoniyatlardan to‘g‘ri foydalanib yaxshi tajriba va tizim yaratgan tuman va mahallalar juda ko‘p. Xo‘jaobod, Mo‘ynoq, Hazorasp, Shahrisabz, Yakkabog‘, Nurota va Sariosiyo kabi tumanlarda yaratilgan ish o‘rinlari ko‘rsatkichi qoniqarli.

Prezident Hazorasp tumani aholisiga bu islohot qanday imkoniyatlar yaratgani haqida “Shovot” mahallasi raisi Sora Rajabovaning fikrlarini so‘ragan. Uning fikrlarini eshitib, barcha mahalla raislariga murojaat qilgan:

“Har bir mahalladagi xonadon va ko‘cha bo‘ylaridagi yer maydonlariga tajribali dehqonlarni jalb qilib, mahallangizda oziq-ovqat ta’minoti bo‘yicha o‘z tajribangizni yaratsangiz, bilasizlarmi qanday katta o‘zgarish bo‘ladi?!”.

Yil yakuni bo‘yicha respublikadagi 200 nafar namunali tajriba yaratgan mahalla raislarini rag‘batlantirishga topshiriq berilgan.

Shuningdek, respublika bo‘yicha 16 ming gektar maydon egasini topmagan. Chunki bu yerlar aholi yashaydigan joydan uzoq, suvi og‘ir, meliorativ holati yomon, lalmi va yaylov maydonlardan tanlangani uchun ularga dehqonlarda qiziqish yo‘q.

Bundan tashqari, 4 ming 300 gektar maydon egalariga kadastr berilmagan, ya’ni ularda hali egalik huquqi yo‘q.

Mutasaddilarga va viloyat hokimlariga tanlovda egasi aniqlanmagan yerlarni aholi uchun qulay maydonlarga almashtirish, yer egalariga kadastr hujjatini rasmiylashtirib berish topshirilgan.