Shavkat Mirziyoyev raisligida 18-iyul kuni ekin yerlari va tomorqadan samarali foydalanish orqali oziq-ovqat yetishtirishni va aholi daromadlarini ko‘paytirish mavzusida videoselektor yig‘ilishi boshlandi. Bu haqda prezident matbuot kotibi xabar qildi.
“Ko‘rib turibsiz – dunyoda oziq-ovqat tanqisligi muammosi kuchayib bormoqda. Ayniqsa, mahsulot yetishtiruvchi asosiy davlatlarning eksportga cheklovlar qo‘yishi va transport-logistikadagi uzilishlar muammolarni yanada chuqurlashtirmoqda. Tahlillarga ko‘ra, joriy yilda dunyoda oziq-ovqat mahsulotlari narxi kamida 20 foizga o‘sishi prognoz qilinmoqda.
Bizda aholi daromadining 40-50 foizi oziq-ovqat mahsulotlariga sarflanadi. Shu bois yuqoridagi xavf-xatarlarning aholimizga ta’sirini yumshatish bo‘yicha har bir mahalla, tuman, viloyat darajasida aniq hisob-kitob va chora-tadbirlar qilish kerak. Buning uchun barcha imkoniyatlarni yaratib berganmiz”, — deydi davlat rahbari yig‘ilish avvalida.
Xususan:
- yil boshida paxta va g‘alla maydonlarini qisqartirish hisobidan aholiga 80 ming gektar maydonni bo‘lib berish boshlangan;
- aholi xonadonlariga xizmat ko‘rsatish bo‘yicha 3 mingdan ziyod “Tomorqa xizmati” infratuzilmasi yaratilgan;
- tomorqada mahsulot yetishtirish uchun joriy yilning o‘zida 400 milliard so‘m imtiyozli mablag‘lar ajratilgan;
- joriy yil 6 oyida 821 ming tonna yoki o‘tgan yilga nisbatan 102 ming tonna ko‘p meva-sabzavot eksport qilingan;
- hozirga qadar ajratilgan 64 ming gektarda jami 785 ming aholi bandligi ta’minlangan.
Izoh (0)