Россия Хавфсизлик кенгаши раҳбарининг ўринбосари Дмитрий Медведев Қримга ҳужум содир бўлса, Украина учун қиёмат куни келишини айтди.
«Интерфакс»нинг ёзишича, Медведев бу ҳақда Волгоградда Иккинчи жаҳон уруши фахрийлари билан бўлиб ўтган учрашувда айтган. Хавфсизлик кенгаши раҳбари ўринбосари «Украина ҳукумати вакиллари бизга таҳдид қилишга уринмоқда, мен Қримга ҳужумни назарда тутяпман», деди.
Шу муносабат билан айтмоқчиманки, шубҳасиз, улар бундай гапларнинг оқибатини тушунади, оқибати эса аниқки, агар шунга ўхшаш бирор нима содир бўлса, уларнинг барчаси учун жуда тез ва оғир қиёмат куни келади, беркиниш ниҳоятда қийин бўлади.Медведевнинг қўшимча қилишича, Украина ва НАТО давлатларининг Қримни Россиянинг бир қисми сифатида тан олишдан бош тортиши «тўғридан-тўғри ва очиқ таҳдиддир».
Украина президенти офисининг маслаҳатчиси Михаил Подолякнинг айтишича, Дмитрий Медведевнинг қиёмат куни билан таҳдид қилаётгани жуда ачинарли.
«Навбатдаги болани ўлдирасизми?» — деб сўради Подоляк Медведевдан.
16 июль куни Украина Мудофаа вазирлиги бош разведка бошқармаси вакили Вадим Скибицкий Украина армияси Қримдаги Россия обетктларига, жумладан Қора денгиз флоти кемаларига зарба бериш учун Американинг HIMARS баравар ўт очиш реактив тизимларидан фойдаланиши мумкинлигини айтган эди.
Украина президенти офисининг маслаҳатчиси Алексей Арестович ҳам «дастлабки техник имконият пайдо бўлиши биланоқ» Украина ҳудудий сувлари орқали ўтадиган Қрим кўприги ҳужумлар объектига айланади, деган.
Изоҳ (0)