Yevroittifoqda avtomobillar sotuvi iyun oyida 15,4 foizga qisqardi — bu rekord darajada past ko‘rsatkichdir, deyiladi Yevropa avtomobil ishlab chiqaruvchilar uyushmasi (ACEA) bayonotida.
Ta’minot zanjiri muammolari mashina ishlab chiqarishni cheklashda davom etar ekan, sotuvlar ketma-ket 11 oy davomida pasayib bormoqda.
Yevropa Ittifoqi mamlakatlarida ro‘yxatga olingan avtomobillar soni (statistik ma’lumotlar mavjud bo‘lmagan Maltadan tashqari) o‘tgan oyda 886 510 taga tushdi.
Bu 1996-yilda ma’lumotlar berish boshlanganidan beri eng past ko‘rsatkichdir. Bir yil avval bu ko‘rsatkich 1,47 mln avtomobilni tashkil qilgan edi.
Yevropa Ittifoqining barcha to‘rtta yirik bozorlarida sotuvlar pasaygan:
- Germaniyada — 18,1 foizga;
- Italiyada — 15 foizga;
- Fransiyada — 14,2 foizga;
- Ispaniyada — 7,8 foizga.
Yevropada yangi avtomashinalar ro‘yxatga olinganlar soni (Yevropa Ittifoqi mamlakatlari hamda 2020-yil 31-yanvarda Yevropa Ittifoqini tark etgan Islandiya, Norvegiya, Shveysariya va Buyuk Britaniya) iyun oyida 16,8 foizga kamayib, 1,66 milliontani tashkil etdi.
Volkswagen guruhi (shu jumladan Skoda, Audi, Seat, Porsche va boshqalar) sotuvi o‘tgan oyda Yevropa Ittifoqida 22,3 foizga, Stellantis (Fiat Chrysler va PSA Group bilan birgalikda) — 17 foizga, BMW — 13,8 foizga kamaydi. Birgina Mercedes-Benz’ning sotuvi 4,2 foizga o‘sgan.
Renault guruhi avtomobillarining sotilishi 0,04 foizga, Lada avtomobillariniki 74 foizga kamaydi.
Yaponiyaga tegishli Toyota avtomobillarining Yevropa Ittifoqidagi savdosi iyun oyida 10,8 foizga, Honda — 5,9 foizga, Nissan — 2,1 foizga oshgan, Janubiy Koreyaning Hyundai avtomobillari esa 4,8 foizga kamaygan.
Joriy yilning olti oyi davomida Yevropa Ittifoqida avtomobillar savdosi 2021-yilning shu davriga nisbatan 14 foizga, butun Yevropada 13,7 foizga kamaydi.
Izoh (0)