Евроиттифоқда автомобиллар сотуви июнь ойида 15,4 фоизга қисқарди — бу рекорд даражада паст кўрсаткичдир, дейилади Европа автомобиль ишлаб чиқарувчилар уюшмаси (АCЕА) баёнотида.
Таъминот занжири муаммолари машина ишлаб чиқаришни чеклашда давом этар экан, сотувлар кетма-кет 11 ой давомида пасайиб бормоқда.
Европа Иттифоқи мамлакатларида рўйхатга олинган автомобиллар сони (статистик маълумотлар мавжуд бўлмаган Мальтадан ташқари) ўтган ойда 886 510 тага тушди.
Бу 1996 йилда маълумотлар бериш бошланганидан бери энг паст кўрсаткичдир. Бир йил аввал бу кўрсаткич 1,47 млн автомобилни ташкил қилган эди.
Европа Иттифоқининг барча тўртта йирик бозорларида сотувлар пасайган:
- Германияда — 18,1 фоизга;
- Италияда — 15 фоизга;
- Францияда — 14,2 фоизга;
- Испанияда — 7,8 фоизга.
Европада янги автомашиналар рўйхатга олинганлар сони (Европа Иттифоқи мамлакатлари ҳамда 2020 йил 31 январда Европа Иттифоқини тарк этган Исландия, Норвегия, Швейцария ва Буюк Британия) июнь ойида 16,8 фоизга камайиб, 1,66 миллионтани ташкил этди.
Volkswagen гуруҳи (шу жумладан Skoda, Аudi, Seaт, Porsche ва бошқалар) сотуви ўтган ойда Европа Иттифоқида 22,3 фоизга, Stellantis (Fiat Chrysler ва PSA Group билан биргаликда) — 17 фоизга, BMW — 13,8 фоизга камайди. Биргина Mercedes-Benz’нинг сотуви 4,2 фоизга ўсган.
Renault гуруҳи автомобилларининг сотилиши 0,04 фоизга, Lada автомобиллариники 74 фоизга камайди.
Японияга тегишли Toyota автомобилларининг Европа Иттифоқидаги савдоси июнь ойида 10,8 фоизга, Honda — 5,9 фоизга, Nissan — 2,1 фоизга ошган, Жанубий Кореянинг Hyundai автомобиллари эса 4,8 фоизга камайган.
Жорий йилнинг олти ойи давомида Европа Иттифоқида автомобиллар савдоси 2021 йилнинг шу даврига нисбатан 14 фоизга, бутун Европада 13,7 фоизга камайди.
Изоҳ (0)