Farg‘onada fuqaroning shaxsiy foto va videolarini tarqatmaslik uchun 2 ming dollar so‘ragan ayol ushlandi

Farg‘ona viloyati Dang‘ara tumanida fuqaroni ijtimoiy tarmoqlar orqali obro‘sizlantirmoqchi bo‘lgan tovlamachi ushlandi, deb xabar bermoqda Iqtisodiy jinoyatlarga qarshi kurashish departamenti.

Qayd etilishicha, Bosh prokuratura huzuridagi departamentning Dang‘ara tuman bo‘limi tomonidan IIB xodimlari bilan hamkorlikda tezkor tadbir o‘tkazilgan. Unda fuqaro D.M. (ayol) fuqaro E.ning qadr-qimmati va obro‘siga putur yetkazishi mumkin bo‘lgan fotosurat va videolarni internet ijtimoiy tarmoqlarida tarqatib yuborishi bilan qo‘rqitgani aniqlangan. U bu ishni qilmaslik evaziga ayoldan tovlamachilik yo‘li bilan 2 ming dollarni talab qilib olgan vaqtida ashyoviy dalillar bilan ushlangan.

Holat yuzasidan Jinoyat kodeksining 165-moddasi (tovlamachilik) bilan jinoyat ishi qo‘zg‘atilib, tergovga tegishliligi bo‘yicha yuborilgan.