Bugun,

  • USD 11095.31
  • RUB 173.84
  • EUR 10772.44

Jinoyat ishlari bo‘yicha Paxtaobod tuman sudi ayollar bilan internet orqali tanishib, ularning intim foto va videolarini tarqatmaslik uchun ulardan pul undirib kelgan shaxsga hukm o‘qidi. Bu haqda “Daryo”ga Andijon viloyat sudi axborot xizmati xabar berdi.

Aniqlanishicha, sudlanuvchi Kamron (barcha ism-shariflar o‘zgartirilgan) 2018-yilning avgust oyida Ra’no bilan Instagram orqali tanishib, Rossiyaning Zelenograd shahrida ko‘rishgan. Ikkinchi va uchinchi uchrashuvdan so‘ng ularning o‘rtasida iliqlik paydo bo‘lib, Moskva shahrida yashay boshlagan. 2018-yilning sentabr oyidan 2019-yil aprel oyiga qadar birga yashagan yoshlar 2019-yilda ajrashgan.

“Kamron bilan dastlab do‘stona gaplashib yurdik, keyin u meni o‘zi ijarada yashaydigan uyda birga yashashga taklif qildi. Shu vaqt davomida Android planshetimni olib, fotosuratlarimni montaj qilib, ularni internet tarmog‘iga joylashtirishini, bundan tashqari yaqin qarindoshlarimga jo‘natib yuborishini aytib, sharmanda bo‘lishni istamasam 18 ming rubl berishimni aytdi. Obro‘m to‘kilishidan qo‘rqib, bank orqali uning hisob raqamiga bo‘lib-bo‘lib qo‘limdan kelganicha jami 15 ming rubl pul jo‘natdim. Lekin u bundan qanoatlanmasdan yana pul so‘rashda davom etdi. Uning harakatlaridan norozi bo‘lib, bir necha marotaba Moskvadagi O‘zbekiston elchixonasiga murojaat qildim. Ammo hech qanday chora ko‘rilmadi”, — deydi sudda ko‘rsatma bergan jabrlanuvchi.

Sudda aniqlanishicha, sudlanuvchi jinoiy ishini davom ettirib, Facebook orqali Toshkent shahrida yashovchi Gullola ismli ayol bilan ham tanishib, unga sevgan ayoli uni tashlab, pullarini o‘g‘irlab ketganini, o‘zi esa Moskvada pulsiz, uysiz qolib ketganini, hozirda ushbu ayolni qidirib topishi lozimligi haqida yozib, ishonchiga kirgan. Kamron Gullola bilan munosabatlari davomida undan avvaliga 500 dollar, keyinchalik 2019-yilning 19-iyul kunidan 2020-yilning 29-sentabr kuniga qadar jami 4 ming 650 dollar pul olgan. Olgan pullarini qaytarmaslik maqsadida ayol jo‘natgan rasm va videolavhalarni turmush o‘rtog‘iga, farzandlariga jo‘natib yuborishini yoki internet tarmog‘iga joylab, sharmanda qilishini aytib qo‘rqitgan.

Mazkur ishni ko‘rib chiqqan sudya Shuhrat Mirzakarimov Kamronni Jinoyat kodeksining 165-moddasi 2-qismi “a” bandi (juda ko‘p miqdorda tovlamachilik)da ayblab, unga nisbatan 5 yilga ozodlikdan mahrum qilish jazosini tayinlagan. Shuningdek, sudlanuvchidan jabrlanuvchilar Gullola foydasiga 4 ming 650 dollar hamda Ra’no foydasiga 2 million 140 ming so‘m pul undirilishi belgilangan.

Izoh
Asosiy yangiliklar
Mahalliy
AOKA “Human.uz” jurnalistlari bilan bog‘liq holat yuzasidan munosabat bildirdi 
Mahalliy
O‘zbekistonda chiqindi gazidan elektr ishlab chiqarish yo‘lga qo‘yiladi 
Dunyo
Putin yo‘qotishlarga qaramay, bahorda Ukrainaga qarshi yangi hujumni rejalashtirmoqda — Bloomberg