Farg‘ona viloyati hokimligi tashabbusi bilan Farg‘ona—Qadamjoy—Shohimardon sayyohlik yo‘nalishi tashkil etilmoqda. Bu haqda OAV vakillari va blogerlar uchun tashkil etilgan press-turda viloyat hokimi o‘rinbosari — turizm va madaniy meros bosh boshqarmasi boshlig‘i Xurshidjon Ahmedov ma’lum qildi, deya xabar berdi “Daryo” muxbiri.
Qayd etilishicha, ushbu yo‘nalishda Shohimardon va Yordon qishloqlari hamda Qirg‘izistonning Qadamjoy tumanidagi tog‘lar, o‘rmonlar, dam olish maskanlari bo‘ylab 3, 5 va 7 kunlik sayohatlar uyushtiriladi.
Shuningdek, o‘zbek va qirg‘iz turoperatorlari tomonidan Qadamjoy—Qizilbuloq—Shohimardon—Dugoba—Ko‘kko‘l yo‘nalishida ikki kunlik sayyohlik yo‘nalishlari ishlab chiqilgan. Yaqin kunlarda bu yo‘nalish bo‘ylab sayyohlar guruhi qatnay boshlaydi.
Xurshidjon Ahmedovning aytishicha, Farg‘ona viloyatida bu yil ichki turizmni rivojlantirish maqsadida 1 million 100 mingdan ziyod, shuningdek, 300 ming nafardan ziyod xorijlik sayyohlarni jalb etish rejalashtirilgan.
Joriy yilning o‘tgan davrida viloyatga qariyb 600 ming nafar mahalliy, 75 mingga yaqin xorijlik sayyohlar tashrif buyurgan.
Press-tur davomida farg‘onalik jurnalist va blogerlar Shohimardon va Yordon qishloqlaridan so‘ng Qadamjoy tumani sayyohlik maskanlarida bo‘lib, qirg‘iz milliy taomlari, qadriyat va an’analari bilan yaqindan tanishdi. Qirg‘izistonda faoliyat ko‘rsatayotgan hamkasblari bilan turizm sohasida hamkorlik qilish bo‘yicha o‘zaro tajriba almashdi.
Izoh (0)