Фарғона вилояти ҳокимлиги ташаббуси билан Фарғона—Қадамжой—Шоҳимардон сайёҳлик йўналиши ташкил этилмоқда. Бу ҳақда ОАВ вакиллари ва блогерлар учун ташкил этилган пресс-турда вилоят ҳокими ўринбосари — туризм ва маданий мерос бош бошқармаси бошлиғи Хуршиджон Аҳмедов маълум қилди, дея хабар берди «Дарё» мухбири.
Қайд этилишича, ушбу йўналишда Шоҳимардон ва Ёрдон қишлоқлари ҳамда Қирғизистоннинг Қадамжой туманидаги тоғлар, ўрмонлар, дам олиш масканлари бўйлаб 3, 5 ва 7 кунлик саёҳатлар уюштирилади.
Шунингдек, ўзбек ва қирғиз туроператорлари томонидан Қадамжой—Қизилбулоқ—Шоҳимардон—Дугоба—Кўккўл йўналишида икки кунлик сайёҳлик йўналишлари ишлаб чиқилган. Яқин кунларда бу йўналиш бўйлаб сайёҳлар гуруҳи қатнай бошлайди.
Хуршиджон Аҳмедовнинг айтишича, Фарғона вилоятида бу йил ички туризмни ривожлантириш мақсадида 1 миллион 100 мингдан зиёд, шунингдек, 300 минг нафардан зиёд хорижлик сайёҳларни жалб этиш режалаштирилган.
Жорий йилнинг ўтган даврида вилоятга қарийб 600 минг нафар маҳаллий, 75 мингга яқин хорижлик сайёҳлар ташриф буюрган.
Пресс-тур давомида фарғоналик журналист ва блогерлар Шоҳимардон ва Ёрдон қишлоқларидан сўнг Қадамжой тумани сайёҳлик масканларида бўлиб, қирғиз миллий таомлари, қадрият ва анъаналари билан яқиндан танишди. Қирғизистонда фаолият кўрсатаётган ҳамкасблари билан туризм соҳасида ҳамкорлик қилиш бўйича ўзаро тажриба алмашди.
Изоҳ (0)