Andijon viloyati hokimi Shuhrat Abdurahmonov prezident Shavkat Mirziyoyevning qarori ijrosini ta’minlash maqsadida qaror qabul qildi. Qarorida vazirlar — Shermatov, Davletov, Ishmetov, Zokirov, Boboyevlar hamda Toshkent shahar hokimi Ortiqxo‘jayevlarga topshiriq bergan.
Gap shundaki, prezident Shavkat Mirziyoyevning 2022-yil 27-iyun kuni “Ommaviy axborot vositalarini qo‘llab-quvvatlash va jurnalistika sohasini rivojlantirish chora-tadbirlari to‘g‘risida”gi qarori qabul qilindi.
Qaror bilan Qoraqalpog‘iston Respublikasi Vazirlar Kengashi va viloyatlar hokimliklariga har yili O‘zbekiston Jurnalistlar uyushmasining tegishli hududiy bo‘limlari faoliyatini samarali tashkil qilish, saqlash xarajatlarini qoplash va moddiy-texnika bazasini mustahkamlash uchun mahalliy byudjetning qo‘shimcha manbalari hisobidan belgilangan tartibda subsidiya sifatida mablag‘ ajratib borish choralarini ko‘rish belgilangan.
Bundan tashqari, mahalliy hokimliklar rahbarlari qaror bilan tasdiqlangan 2022—2023-yillarda Ommaviy axborot vositalarini qo‘llab-quvvatlash hamda jurnalistika sohasini yanada rivojlantirish chora-tadbirlari dasturida belgilangan vazifalarning o‘z vaqtida va sifatli bajarilishi uchun shaxsan mas’ul ekanliklari ko‘rsatib o‘tilgan.
Mazkur qarorda o‘ziga yuklatilgan vazifalar ijrosini ta’minlash maqsadida barcha viloyat hokimlari qatorida Andijon viloyati hokimi Shuhrat Abdurahmonov ham 2022-yilning 8-iyul kuni “O‘zbekiston Respublikasi prezidentining 2022-yil 27-iyundagi PQ-294-sonli qarori haqida”gi qarorini imzolagan.
Ushbu hujjatni ko‘zdan kechirar ekanmiz, uning birinchi bandida prezident qarori ijro uchun qabul qilinganligi qayd etiladi. Ikkinchi band esa salkam olti sahifadan iboratligi va prezident qarorining to‘liq, bandma-band nuqta, verguliga qadar ko‘chirilganligini ko‘rish mumkin. Vaholanki, ushbu va birinchi bandni bitta qilib “prezidentning ushbu qarori hamda mazkur hujjat bilan tasdiqlangan ilovalar ma’lumot va ijro uchun qabul qilinsin” degan jumla bilan tugallash mumkin edi. Biroq qaror loyihasini ishlab chiqqan va uni tasdiqlagan hokimlik yuridik xizmati hujjatning ayni o‘zini ko‘chirib qo‘yishni lozim topgan. Bunga viloyat rahbari ham e’tibor qilmay imzo qo‘ygan.
Qarorning 4-bandida viloyat hokimining to‘rt nafar o‘rinbosariga dasturda belgilangan vazifalarning o‘z vaqtida va sifatli bajarilishi uchun shaxsan mas’ul ekanliklari ko‘rsatib o‘tilgan. Ammo ularga aynan qanday vazifa yuklatilganligi aniq-tiniq qilib belgilab berilmagan. Qarorga ilova qilingan dasturda esa o‘rinbosarlarning nomlari zikr etilmagani nima vazifalar yuklatilganligini so‘roq ostiga qo‘yishi shubhasiz.
Hokim qaroridagi 1- va 2-ilovalar prezident qaroridagi ilovalarni aynan so‘zma-so‘z takrorlagan. Qiziq jihati ushbu ilovalarning qo‘shimcha qilinishi bo‘yicha qarorning biror bandida aytilmagan. Balki, ushbu ilovalar hokimlik mas’ullarining yoki yuristlarining tushunmaganligi, adashganligidan qarorga kiritilgandir, degan gumondamiz.
Qaror bilan tasdiqlanmagan, ammo ilova qilingan 3-ilovadagi chora-tadbirlar dasturini ko‘zdan kechirar ekanmiz Dastur viloyatga moslashtirish o‘rniga prezident qarori bilan tasdiqlangan Dasturdan to‘liq ko‘chirib o‘tkazilganligi ko‘rinadi. Ilovaga muvofiq Axborot va ommaviy kommunikatsiyalar agentligi direktori, vazirlik va idoralarga hamda bir qator tashkilotlarning yuqori turuvchi organlari rahbarlari zimmasiga vazifalar yuklatilgan. Shu orqali Shuhrat Abdurahmonov viloyatdagi tegishli tashkilotlarga topshiriqni yuqori turuvchi organlar orqali bergan bo‘lishi mumkin, degan yaxshi gumondamiz. Materiallarni tayyorlash jarayonida boshqa viloyat hokimlarining aynan ushbu mavzudagi qarorlari bilan tanishib chiqqanimizda Samarqand, Namangan, Jizzax viloyati hamda Toshkent shahri hokimlari dasturning o‘zlariga moslashtirganliklarini ko‘rish mumkin.
Qo‘l uchida qabul qilingan mazkur hujjat Shuhrat Abdurahmonov tomonidan imzolangan birinchisi emas. U shu kunga qadar bir nechta prezident farmon va qarorlari ijrosini ta’minlash maqsadida qabul qilgan qarorlarda ham belgilangan normativ hujjatlar qanday bo‘lsa, shunday tarzda ko‘chirib qo‘yilgan holatda qabul qilgan.
Shulardan kelib chiqib, bir nechta savollar tug‘iladi. Balki, hujjatlar hokimlikdagi ishonchli shaxslar tomonidan hokimga tegishli elektron raqamli imzodan foydalanilgan holda imzolanayotgandir? Nahotki Shuhrat Abdurahmonov o‘ziga tegishli bo‘lgan qaror va farmoyishlarni qabul qilish oldidan ko‘rib chiqmasa?
Hududiy adliya organlari rahbarlari loyihani belgilangan tartibda huquqiy ekspertizadan o‘tkazish va loyiha qonunchilik hujjatlariga muvofiq bo‘lsa, unga xulosa berishi, agarda e’tirozlar mavjud bo‘lsa, loyihani mahalliy ijro etuvchi yoki vakillik organiga qaytarishi lozim. Bizningcha, hududiy adliya organlari huquqiy ekspertizadan o‘tkazish ishlarini bajarmaydi. Balki, bajarsa-da xatolarni to‘g‘rilash uchun qaytarish o‘rniga hokimlarning gapini ikki qilgisi kelmasdan, loyihalarga ijobiy xulosa berish orqali tinch yashashni zarur deb bilishar yoki hududlarda yetarli darajadagi malakaga ega yuristlar yetishmas?
“E-qaror” elektron tizimi orqali qabul qilinib, e’lon qilingan qarorlarni o‘rganib chiqish davomida mahalliy ijro etuvchi organlar rahbarlarining huquqiy savodxonligini yanada oshirish, adliya organlari mas’uliyatini ikki karra oshirish zaruriyati mavjudligini yaqqol namoyon bo‘ldi.
“Daryo” viloyat, shahar va tuman hokimliklari tomonidan qabul qilingan qaror va farmoyishlarni tahlil qilishda davom etadi va mavzuga yana qaytadi.
Ibrohim Ohunov
Izoh (0)