Qoraqalpog‘iston voqealarida jarohatlangan va ayni paytda Mudofaa vazirligi Markaziy harbiy klinik shifoxonasida davolanayotgan harbiylar jurnalistlar savollariga javob berdi.
1–2-iyuldagi tartibsizliklarda vafot etgan 18 kishidan 4 nafari – harbiy xizmatchilar bo‘lgan. Shuningdek, 243 kishi jarohatlanib, shifoxonalarga murojaat qilgan, shuning 93 nafari – harbiylar.
Harbiy shifoxonaning Travmatologiya bo‘linmasi katta ordinatori Nodirjon Xoldarovning aytishicha, 3—4-iyul kunlari Nukus shahridan turli tan jarohati olgan 20 dan ziyod harbiy xizmatchi Toshkentga olib kelingan.
“Kerakli jarrohlik amaliyotlari o‘tkazildi, hozirgi paytda kerakli muolajalarni olishmoqda. Ularning holati barqaror. O‘qotar quroldan, keyin turli xil toshlardan, temir buyumlar va turli xil kesuvchi, qirquvchi buyumlardan tan jarohati olgan bemorlarimiz bor. Lekin ko‘rsatilgan tibbiy muolajalardan so‘ng, ularning ahvoli yaxshi stabil holatda, muolajalarni davom ettirishmoqda. Tez kunlarda ularni oyoqqa turgazib, safga qaytaramiz va ular xizmatini davom ettirishadi”, – deydi u.
Shifoxonada davolanayotgan harbiylarning har biri turlicha holatda, ular tartibsizliklarning turli nuqtalarida bo‘lishgan.
“Birinchi yechintirib olishdi, yechintirib olib, tosh bilan ham, tayoq bilan ham uryapti”
— Tarqatishga borsak, ikki tomondan odamlar chiqib, bizga nisbatan nafrat uyg‘onib, shunday toshlar otib, so‘kinib: “Ketinglar, sizlar aralashmanglar”, – deb baqir-chaqir qildi. Biz qo‘limizdan kelgancha qaytardik.Biz ham endi jami 50 kishi “tolpa” bo‘lib boryapmiz, mana shu yerda men nimagadir qoqildimmi, yiqilib tushdim. Endi o‘zimga kelaman degandim, birdaniga tortib ketishdi. Tortib ketib, urdi. Birinchi yechintirib olishdi, yechintirib olib, tosh bilan ham, tayoq bilan ham uryapti. Katta tosh bilan boshimga urgan vaqtida bir o‘zimdan ketib, bir o‘zimga kelsam, haliyam urib yotgan ekan.
Biz alohida mustaqil bo‘lamiz deb, shunday ohangda gapirib yotgan edi. Hammasi ichib olgan, hididan bildim. O‘zini tutishidan ham ma’lum bo‘lib turgan edi.
Menda (o‘qotar) qurol yo‘q edi, biz qurollantirilmagan edik. Oldimizda o‘zimizni himoya qiladigan qalqon, “dubinka”, bosh kiyimimiz, “kaska”miz bor edi, shu bilan qurollangan edik.
Hamma yerim qonga belanib bo‘lgan edi, qoraqalpoqchasiga gapirdi: “Bo‘ldi, bu ta’zirini oldi, qo‘yib yuborsak bo‘ladi endi”, – dedi, bir amallab chiqqanimizda, yana kiyimimdan ushlab qaytib olib kiryapti, uryapti.
Abbos Namozov, milliy gvardiya xodimi, kapitan
Izoh (0)