Onkologik kasallikka chalinganlar emlanishi mumkinmi? Mutaxassis javob berdi

Sog‘liqni saqlash vazirligi onkologik kasallikka chalinganlar emlanishi mumkinligi yo mumkin emasligi bo‘yicha ma’lumot berdi.

Qayd etilishicha, COVID-19 infeksiyasi onkologik kasallikka chalingan bemorlarda juda og‘ir o‘tadi. Shu bois Jahon sog‘liqni saqlash tashkiloti tomonidan onkologik xastaliklar bilan og‘riyotgan bemorlarni koronavirus infeksiyasiga qarshi emlash zarur, deb belgilangan.

Shifokor E’zozbek Rizayevning aytishicha, bunda tibbiy muolajalar turiga e’tibor qaratish lozim.

“Ya’ni, agar bemorda kimyo yoki nur terapiyasi kursi o‘tkaziladigan bo‘lsa, emlash ushbu muolajadan avval qilinishi zarur.

Sababi bu tibbiy muolajalar inson organizmida immun tizimining kuchsizlanishiga olib keladi. Natijada bu payt bemor vaksina olganida tanada koronavirus infeksiyasiga qarshi javob reaksiyasi — antitanachalar ishlab chiqarilishi past bo‘ladi.

Demak, onkologik kasalliklarga chalinganlar COVID-19 ni yengil o‘tkazishi uchun ham emlanishi zarur”, — deydi u.