O‘zbekistonda ayrim qurbonlik qilingan jonliqlarning boshi, terisi va ichaklari chiqindi sifatida tashlab yuborilgani aniqlandi

O‘zbekistonda 9-iyul kuni Qurbon hayiti bayrami nishonlanib, qator hududlarda qurbonlik uchun jonliqlar so‘yilib, go‘shtlari tarqatildi. Shu bilan birga, ba’zi fuqarolar qurbonlik qilingan mol va qo‘ylarning ayrim qismlarini chiqindi sifatida tashlab yuborgani aks etgan tasvirlar ijtimoiy tarmoqlarda tarqaldi.

Xususan, tarqalgan videolarning birida aytilishicha, Qarshi shahrida qurbonlik qilingan qo‘chqorlarning kalla-pochasi ko‘chaga tashlab ketilgan.

“Daryo” mushtariylaridan biri Toshkent viloyati Zangiota tumani Nazarbek shaharchasida avtomobil yo‘li kesishmasida bir uyum chiqindilar tashlangani, unda qurbonlik qilingan mol va qo‘y terilari borligiga guvoh bo‘lgan.

Buxoroda esa qurbonlik qilingan mol va qo‘ylarning ichak-chavoqlari ariq suvlariga tashlangani aniqlangan.

Ariqlar viloyat Ekologiya boshqarmasi xodimlari tomonidan tozalangan.