Poytaxtda ilk bor U-12, U-14, U-16 yosh toifalari o‘rtasida, katta tennis bo‘yicha JWTS seriyasiga kiruvchi Markaziy Osiyo turniri bo‘lib o‘tdi.
Unda yurtimizning iste’dodli yosh raketka ustalari qatori Qozog‘iston va Pokiston mamlakatlarining tennischilari ham qatnashdi. Turnirda ishtirokchilar sovrinli o‘rinlar bilan birgalikda, Ispaniyada o‘tkaziladigan o‘quv-mashg‘ulot yig‘inlarida qatnashish huquqini qo‘lga kiritish uchun har tomonlama murosasiz bahslarni olib borishdi. Bir so‘z bilan aytganda, Ispaniya kortlarida o‘tadigan mashg‘ulotlarga yo‘l Toshkent maydonlaridan boshlandi.
“O‘zmilliybank” AJ homiyligida tashkil etilib, 2 hafta davom etgan xalqaro turnirning birinchi tur bahslarida 50 nafardan ortiq sportchilar qatnashgan bo‘lsa, ikkinchi turda esa 70 nafardan ortiq atletlar g‘oliblik uchun kortga tushishdi. O‘smir yoshlar o‘rtasida O‘zbekistonda ilk marotaba tashkil etilgan Markaziy Osiyo seriyasiga kiruvchi bahslar shiddatli tus oldi. Unga ko‘ra, 12 yoshgacha bo‘lgan o‘g‘il bolalar bellashuvlarida birinchi o‘rinni Saidamir Ikromov, ikkinchi o‘rinni Kamron Ikromov, uchinchi o‘rinni esa Mahmud Beknazarovlar qo‘lga kiritishdi. 14 yoshgacha bo‘lgan sportchilar bahslarida esa Ahmadjon Toshmuhammedov, Suxrob Saidov, Alan Zinnatullinlar mos ravishda g‘olib va sovrindorlar qatoridan joy egallashdi.
“Bizda birinchi marta JWTS loyihasi Germaniya bilan hamkorlikda amalga oshirilmoqda. Loyiha markaziy Osiyoda tennisni rivojlantirish maqsadida ishlab chiqilgan. Bu musobaqalar markaziy Osiyo sportchilari uchun juda muhim. Musobaqa tennischilarga Yevropaga chiqish imkonini beradi. Bilamizki, Yevropa va Amerika tennis maktabi kuchli. Bu aloqalar esa sportchilar mahoratining ortishiga yordam beradi. Musobaqalar o‘g‘il qizlar uchun katta imkoniyatlarni taqdim etganligi sababli ham barcha katta ishtiyoq bilan g‘oliblik uchun baxslarga kirishdi. Shu o‘rinda tennisni rivojlantirishda va musobaqalarni tashkil etishda o‘zining munosib hissasini qo‘shib kelayotgan «O‘zmilliybank ” AJ ga minnatdorlik bildirmoqchiman”, — deydi O‘zbekiston tennis federatsiyasining bosh kotibi Iroda To‘laganova.
Shiddatli o‘yinlar natijasida 12 yoshli o‘g‘il bolalar o‘rtasida hamyurtimiz Saidamir Ikramov, qizlar o‘rtasida Muslima Turdimurodova, 14 yoshlilar o‘rtasida Ahmadjon Toshmuhammedov va Nigina Alimova, 16 yoshlilar orasida Sarvar Azamatov va Samira Xaziyeva g‘oliblik shohsupasiga chiqishdi.
Bahslarda g‘olib va sovrindor bo‘lgan raketka ustalari O‘zbekiston tennis federatsiyasi hamda tashkilotchilar tomonidan munosib taqdirlandi.
Reklama huquqi asosida.
Izoh (0)