Пойтахтда илк бор U-12, U-14, U-16 ёш тоифалари ўртасида, катта теннис бўйича JWTS сериясига кирувчи Марказий Осиё турнири бўлиб ўтди.
Унда юртимизнинг истеъдодли ёш ракетка усталари қатори Қозоғистон ва Покистон мамлакатларининг теннисчилари ҳам қатнашди. Турнирда иштирокчилар совринли ўринлар билан биргаликда, Испанияда ўтказиладиган ўқув-машғулот йиғинларида қатнашиш ҳуқуқини қўлга киритиш учун ҳар томонлама муросасиз баҳсларни олиб боришди. Бир сўз билан айтганда, Испания кортларида ўтадиган машғулотларга йўл Тошкент майдонларидан бошланди.
«Ўзмиллийбанк» АЖ ҳомийлигида ташкил этилиб, 2 ҳафта давом этган халқаро турнирнинг биринчи тур баҳсларида 50 нафардан ортиқ спортчилар қатнашган бўлса, иккинчи турда эса 70 нафардан ортиқ атлетлар ғолиблик учун кортга тушишди. Ўсмир ёшлар ўртасида Ўзбекистонда илк маротаба ташкил этилган Марказий Осиё сериясига кирувчи баҳслар шиддатли тус олди. Унга кўра, 12 ёшгача бўлган ўғил болалар беллашувларида биринчи ўринни Саидамир Икромов, иккинчи ўринни Камрон Икромов, учинчи ўринни эса Маҳмуд Бекназаровлар қўлга киритишди. 14 ёшгача бўлган спортчилар баҳсларида эса Аҳмаджон Тошмуҳаммедов, Сухроб Саидов, Алан Зиннатуллинлар мос равишда ғолиб ва совриндорлар қаторидан жой эгаллашди.
«Бизда биринчи марта JWTS лойиҳаси Германия билан ҳамкорликда амалга оширилмоқда. Лойиҳа марказий Осиёда теннисни ривожлантириш мақсадида ишлаб чиқилган. Бу мусобақалар марказий Осиё спортчилари учун жуда муҳим. Мусобақа теннисчиларга Европага чиқиш имконини беради. Биламизки, Европа ва Америка теннис мактаби кучли. Бу алоқалар эса спортчилар маҳоратининг ортишига ёрдам беради. Мусобақалар ўғил қизлар учун катта имкониятларни тақдим этганлиги сабабли ҳам барча катта иштиёқ билан ғолиблик учун бахсларга киришди. Шу ўринда теннисни ривожлантиришда ва мусобақаларни ташкил этишда ўзининг муносиб ҳиссасини қўшиб келаётган «Ўзмиллийбанк » АЖ га миннатдорлик билдирмоқчиман», — дейди Ўзбекистон теннис федерациясининг бош котиби Ирода Тўлаганова.
Шиддатли ўйинлар натижасида 12 ёшли ўғил болалар ўртасида ҳамюртимиз Саидамир Икрамов, қизлар ўртасида Муслима Турдимуродова, 14 ёшлилар ўртасида Аҳмаджон Тошмуҳаммедов ва Нигина Алимова, 16 ёшлилар орасида Сарвар Азаматов ва Самира Хазиева ғолиблик шоҳсупасига чиқишди.
Баҳсларда ғолиб ва совриндор бўлган ракетка усталари Ўзбекистон теннис федерацияси ҳамда ташкилотчилар томонидан муносиб тақдирланди.
Реклама ҳуқуқи асосида.
Изоҳ (0)