FIFA sobiq prezidenti Yozef Blatter va UEFA sobiq rahbari Mishel Platini korrupsiya ishi bo‘yicha oqlandi, deya xabar beradi Reuters.
Avvalroq Shveysariya bosh prokuraturasi Yozef Blatter va Mishel Platinini firibgarlik, pullarni o‘zlashtirish, jinoiy ravishda noto‘g‘ri boshqaruv va hujjatlarni qalbakilashtirishda ayblagan edi. 2011-yilda FIFA Platini foydasiga 2 million shveysar frankni (2,08 million dollar) noqonuniy ravishda o‘tkazib bergan.
Blatter ham, Platini ham o‘z aybini rad etgan. Ikkala sobiq rahbar 1998-yildan 2002-yilgacha Mishelning konsalting faoliyati bo‘yicha og‘zaki kelishuvga erishganini tan olgan.
Ular besh yilgacha qamoq jazosiga hukm qilinishi mumkin edi. Keyinchalik prokuratura ularga 18 oylik sinov muddati so‘ragani ma’lum bo‘ldi.
8-iyul kuni Shveysariya sudi FIFAni 17 yil davomida boshqargan Yozef Blatter va UEFA sobiq rahbari Mishel Platiniga nisbatan oqlov hukmini e’lon qildi.
Eslatib o‘tamiz, Blatter 2015-yilda korrupsiyada ayblanib FIFA prezidentligidan olingan va sakkiz yil muddatga futbolga oid har qanday faoliyatdan chetlatilgandi. 2016-yilda FIFA apellyatsiya qo‘mitasi ushbu muddatni olti yilga qisqartirgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)