FIFA “Mash’al” klubi va nigeriyalik futbolchi Ibe Mikael Okoro o‘rtasidagi bahsli vaziyat ijobiy yakunlanganidan so‘ng, klubga qo‘yilgan transfer taqiqini olib tashladi. Bu haqida “Mash’al” klubi matbuot xizmati ma’lum qildi.
“Mash’al”ning sobiq futbolchisi Ibe Mikael Okoro klub u bilan to‘liq hisob-kitob qilmagani borasida FIFAga shikoyat qilgandi.
Mazkur shikoyatni o‘rganib chiqqan FIFA Futbolchilar maqomi va o‘tishi qo‘mitasi 2022-yil aprel oyida “Mash’al” va Ibe Mikael Okoro o‘rtasidagi bahsli vaziyat yuzasidan qaror chiqarib, “Mash’al” klubi zimmasiga yuklatilgan jarima to‘lovlarini 45 kun muddat ichida to‘lash shartini qo‘ygan.
Futbolchining vakillari FIFAga klub bu borada to‘liq to‘lovni amalga oshirmadi, deya murojaat qilgan. Shu sababli tashkilot 30-maydan e’tiboran jamoaga transfer taqiqini belgilagan.
Muborakliklar Okoroga barcha to‘lovlarni amalga oshirib, FIFAga ma’lumotlarni taqdim etgan va tashkilot “Mash’al” jamoasi taqdim etgan ma’lumotlarni o‘rganib chiqib, transfer taqiqini bekor qilgan.
Avvalroq “Buxoro” futbol klubi va uning sobiq darvozaboni turkmanistonlik Rahat Japarov o‘rtasidagi nizoli vaziyat yuzasidan FIFA buxoroliklarga transfer taqiqini qo‘ygandi. 10-fevral kuni “Buxoro” jamoasi Japarov oldidagi qarzdorlikni to‘liq bartaraf etgan va undan transfer taqiqi olib tashlangandi. Shuningdek, FIFA fransiyalik futbolchi Diakite Abdelaye bilan bog‘liq muammo sabab “Nasaf”ga qo‘yilgan taqiqni olib tashlagani xabar qilingandi.
Izoh (0)