ФИФА «Машъал» клуби ва нигериялик футболчи Ибе Микаэл Окоро ўртасидаги баҳсли вазият ижобий якунланганидан сўнг, клубга қўйилган трансфер тақиқини олиб ташлади. Бу ҳақида «Машъал» клуби матбуот хизмати маълум қилди.
«Машъал»нинг собиқ футболчиси Ибе Микаэл Окоро клуб у билан тўлиқ ҳисоб-китоб қилмагани борасида ФИФАга шикоят қилганди.
Мазкур шикоятни ўрганиб чиққан ФИФА Футболчилар мақоми ва ўтиши қўмитаси 2022 йил апрель ойида «Машъал» ва Ибе Микаэл Окоро ўртасидаги баҳсли вазият юзасидан қарор чиқариб, «Машъал» клуби зиммасига юклатилган жарима тўловларини 45 кун муддат ичида тўлаш шартини қўйган.
Футболчининг вакиллари ФИФАга клуб бу борада тўлиқ тўловни амалга оширмади, дея мурожаат қилган. Шу сабабли ташкилот 30 майдан эътиборан жамоага трансфер тақиқини белгилаган.
Муборакликлар Окорога барча тўловларни амалга ошириб, ФИФАга маълумотларни тақдим этган ва ташкилот «Машъал» жамоаси тақдим этган маълумотларни ўрганиб чиқиб, трансфер тақиқини бекор қилган.
Аввалроқ «Бухоро» футбол клуби ва унинг собиқ дарвозабони туркманистонлик Раҳат Жапаров ўртасидаги низоли вазият юзасидан ФИФА бухороликларга трансфер тақиқини қўйганди. 10 февраль куни «Бухоро» жамоаси Жапаров олдидаги қарздорликни тўлиқ бартараф этган ва ундан трансфер тақиқи олиб ташланганди. Шунингдек, ФИФА франциялик футболчи Диаките Абделае билан боғлиқ муаммо сабаб «Насаф»га қўйилган тақиқни олиб ташлагани хабар қилинганди.
Изоҳ (0)