6-iyul kuni AQSHning Janubiy Dakota shtati Su-Fols shaharchasida osmon yashil tusga kirdi, deb yozadi Meduza. Bu soatiga 140 km tezlikkacha yetgan kuchli shamoldan keyin yuz berdi.
Su-Fols Ob-havo xizmati meteorologi Piter Rojerning so‘zlariga ko‘ra, dovul vaqtida yoki undan oldin quyosh nuri atmosferada tarqalib (sochilib) ketishi tufayli, osmon ba’zan noodatiy tuslarga kiradi. Ularning paydo bo‘lish mexanizmi dovul chog‘ida hosil bo‘ladigan va yirik suv tomchilariga to‘la zich bulutlar o‘zidan asosan ko‘k va havorang tuslarni chiqarishi bilan bog‘liq. Shu tariqa, kunbotar paytidagi quyoshning sariq nurlari ta’sirida ular yashilimtir tusga kirishi mumkin.
Rojerning aytishicha, momaqaldiroq paytida yashil osmon kuchli do‘ldan darak berishi mumkin. Chunonchi, qo‘shni Minnesota shtatidagi Leyk-Uilson shaharchasida beysbol koptogi kattaligidagi do‘l haqida xabar berishgan.
Izoh (0)