Қибрай туманининг Чинобод кўчасидан автомашинага чиққан ҳомиладор аёлда кутилмаганда тўлғоқ бошланади. Унга ҳамроҳ бўлган қайнонаси узоқдан тиббиёт муассасаси биносига кўзи тушиб, такси ҳайдовчисига ўша ерга олиб боришини айтади.
Тошкентдаги Улуғбек шаҳарчаси 1-сон поликлиникаси ҳудудига Matiz русумли автомашинада олиб келинган ҳомиладор аёлга зудлик билан тиббий ёрдам кўрсатишга киришилди.
Бу вазиятда ҳар бир сония ҳисобли эди.Туғуруқ жараёни эса аллақачон бошланган. Шошилиш зарур! Аслида оилавий поликлиника гўдакни дунёга келтириш учун мўлжалланмаган бўлса-да, аёлни шундоққина рўпарадаги ушбу муассаса биносига олиб ўтишга ҳам фурсат етмади.
Поликлиника мудираси Ҳилола Жамилова ўта тезкорлик билан бутун масъулиятни зиммасига олиб, автомобилнинг ўзида аёлга доялик қилишга киришди.
Мутахассислиги акушер-гинеколог бўлган мудира ва унинг жамоаси саъй-ҳаракати ва қатъияти сабабли туғуруқ муваффақиятли амалга оширилди.
Шундан сўнг она ва бола соғлом ҳолда поликлиникага энг яқин ҳисобланган Қибрай тумани тиббиёт бирлашмаси тасарруфидаги туғуруқ комплексига мутахассис ҳамроҳлигида олиб борилган.
Ҳозир она-боланинг аҳволи яхши, улар саломатлиги туғуруқ комплекси шифокорлари назорати остида.
Туғуруқ жараёни кутилмаганда бошланган ҳомиладор аёлга автомашинада доялик қилган поликлиника мудираси Ҳилола Жамилова Соғлиқни сақлаш вазирлиги томонидан тақдирланди.
Шифокорга вазир ўринбосари Элмира Боситханова томонидан соғлиқни сақлаш вазири Бекзод Мусаевнинг ташаккурномаси ва эсдалик совғалари топширилди.
Ўз навбатида, фавқулодда вазиятларда ўзини йўқотмай, касб бурчини сидқидилдан бажаришда жонбозлик кўрсатаётган соғлиқни сақлаш тизимининг бундай фидойи ходимлари миллий тиббиётимизнинг янги имижини яратишда муҳим рол ўйнаши таъкидланди.
Изоҳ (0)