Avval xabar berilganidek, 25-iyun kuni O‘zbekiston Konstitutsiyasiga o‘zgartishlar kiritish to‘g‘risidagi qonun loyihasi jamoatchilik muhokamasiga qo‘yildi.
Unga ko‘ra, davlat ijtimoiy jihatdan ehtiyojmand va kam ta’minlangan, uy-joy sharoitlarini yaxshilashga muhtoj bo‘lgan fuqarolarni qonunda belgilangan tartibda uy-joy bilan ta’minlashi qayd etilgan (39-modda).
Prezident Shavkat Mirziyoyev 2022-yil 20-iyundagi Konstitutsiyaviy komissiya a’zolari bilan uchrashuvdagi nutqida “Konstitutsiyamizda fuqarolarimizning uy-joyga bo‘lgan huquqlarini himoya qilish, uning daxlsizligini kafolatlash, aholining barcha qatlamlari, ayniqsa, muhtoj toifalarni uy-joy bilan ta’minlash bo‘yicha davlatning majburiyatlarini mustahkamlash zarur”ligini taklif etgan edi.
Bugungi kunda aholining o‘sish dinamikasi ularning uy-joy bilan ta’minlashga nisbatan katta ehtiyoj borligini keltirib chiqarmoqda. Ayniqsa, bunda turar joyga muhtoj xotin-qizlar, yosh oilalar, ijtimoiy jihatdan ehtiyojmand oilalarni uy-joy bilan ta’minlash masalasiga e’tibor qaratilib davlat dasturlari asosida muammolarni hal etish zarurati mavjud .
Aholini uy-joy muammosini hal etish bo‘yicha keyingi besh yilda yurtimizda, ipoteka dasturlari doirasida, 140 mingdan ortiq uy-joylar barpo etildi.
Har bir oilaning o‘z xonadoniga ega bo‘lishi uning mehnat samaradorligiga ham ijobiy ta’sir ko‘rsatib, shaxsning iqtisodiy faolligini oshiradi. Bu esa ijtimoiy davlatning muhim ko‘rsatkichlaridan biri hisoblanadi.
Ushbu normaning kiritilishi ijtimoiy jihatdan ehtiyojmand va kam ta’minlangan oilalarning, uy-joy sharoitlarini yaxshilashga muhtoj bo‘lgan fuqarolarni turar joyga bo‘lgan ehtiyojlarini samarali va manzilli ta’minlashga xizmat qiladi.
Izoh (0)