Аввал хабар берилганидек, 25 июнь куни Ўзбекистон Конституциясига ўзгартишлар киритиш тўғрисидаги қонун лойиҳаси жамоатчилик муҳокамасига қўйилди.
Унга кўра, давлат ижтимоий жиҳатдан эҳтиёжманд ва кам таъминланган, уй-жой шароитларини яхшилашга муҳтож бўлган фуқароларни қонунда белгиланган тартибда уй-жой билан таъминлаши қайд этилган (39-модда).
Президент Шавкат Мирзиёев 2022 йил 20 июндаги Конституциявий комиссия аъзолари билан учрашувдаги нутқида «Конституциямизда фуқароларимизнинг уй-жойга бўлган ҳуқуқларини ҳимоя қилиш, унинг дахлсизлигини кафолатлаш, аҳолининг барча қатламлари, айниқса, муҳтож тоифаларни уй-жой билан таъминлаш бўйича давлатнинг мажбуриятларини мустаҳкамлаш зарур»лигини таклиф этган эди.
Бугунги кунда аҳолининг ўсиш динамикаси уларнинг уй-жой билан таъминлашга нисбатан катта эҳтиёж борлигини келтириб чиқармоқда. Айниқса, бунда турар жойга муҳтож хотин-қизлар, ёш оилалар, ижтимоий жиҳатдан эҳтиёжманд оилаларни уй-жой билан таъминлаш масаласига эътибор қаратилиб давлат дастурлари асосида муаммоларни ҳал этиш зарурати мавжуд .
Аҳолини уй-жой муаммосини ҳал этиш бўйича кейинги беш йилда юртимизда, ипотека дастурлари доирасида, 140 мингдан ортиқ уй-жойлар барпо этилди.
Ҳар бир оиланинг ўз хонадонига эга бўлиши унинг меҳнат самарадорлигига ҳам ижобий таъсир кўрсатиб, шахснинг иқтисодий фаоллигини оширади. Бу эса ижтимоий давлатнинг муҳим кўрсаткичларидан бири ҳисобланади.
Ушбу норманинг киритилиши ижтимоий жиҳатдан эҳтиёжманд ва кам таъминланган оилаларнинг, уй-жой шароитларини яхшилашга муҳтож бўлган фуқароларни турар жойга бўлган эҳтиёжларини самарали ва манзилли таъминлашга хизмат қилади.
Изоҳ (0)