Prezident Shavkat Mirziyoyev Bolalar gematologiyasi, onkologiyasi va klinik immunologiyasi markaziga tashrif buyurganida, u yerda davolanayotgan bolalar davlat rahbariga yo‘llagan maktublarni olgan edi. “Hammasini o‘qib, albatta, javob beraman”, — degan edi prezident. Davlat rahbari matbuot kotibining yozishicha, javob xatlari o‘z manzillariga yetib bordi. Ulardan biri — xovoslik Odinaxonga yo‘llangan prezident maktubini Sirdaryo viloyati hokimi yetkazgan va o‘qib bergan.
Ma’lum qilinishicha, Xovos tumanining “Xovosobod” mahallasida istiqomat qilayotgan Odinaxon Abdulhamidova endigina 12 yoshni qarshi olgan. U Respublika Bolalar gematologiyasi, onkologiyasi va klinik immunologiyasi markazida 4 yoshidan buyon davolanib keladi.
Odinaxon prezidentga yo‘llagan maktubida o‘zi va boshqa davolanayotgan bolalar nomidan, kasallikdan aziyat chekayotgan bolalarni sog‘lig‘ini tiklash, ularga namunali tibbiy xizmat ko‘rsatish maqsadida yaratilgan shart-sharoit uchun davlat rahbariga o‘z tashakkurini izhor etib, bolalarcha beg‘ubor istaklarini bildirgan. Musiqa va rasmga qiziqishini, rus tilini mukammal o‘rganishi va kelajakda shifokor bo‘lishi uchun kompyuter sovg‘a qilishlarini so‘ragan.
30-iyul kuni erta tongdan viloyat hokimi G‘ofurjon Mirzayev boshchiligidagi bir guruh faollar uning xonadonida bo‘lib, Shavkat Mirziyoyevning javob maktubi va sovg‘asini topshirgan. Shu bilan birga unga o‘quv qurollari va darsliklar, qo‘shimcha sovg‘alar ham tuhfa etilgan.
Prezident maktubida, jumladan, shunday deyiladi:
Qadrli Odinaxon qizim!Xatingni o‘qib, bugungi kunda mamlakatimiz bolalari naqadar beg‘ubor orzu-intilishlar bilan yashayotganini yana bir bor chin yurakdan his etdim.
Kelajakda oshpaz bo‘lmoqchi ekaning, “Mehrli maktab”da musiqa va rasm chizishni yoqtirib qolganing haqida yozibsan.
Til o‘rganishga ishtiyoqing balandligini bilib, yanada xursand bo‘ldim.
Axir, biz orzu qilgan barkamol avlod mana shunday zamonaviy bilim va kasb-hunarlarni egallaydigan yosh o‘g‘il-qizlardan tashkil topadi!
Ishonchim komil, yuksak intilish va tirishqoqlik bilan o‘z maqsad muddaolaringga albatta yetasan. Bu yo‘lda senga sovg‘a qilinayotgan kompyuter ham yordam beradi, deb o‘ylayman.
Dilingdagi ezgu orzu-niyatlaring doimo senga hamroh bo‘lsin, deyiladi javob maktubida.
Eslatib o‘tamiz, 2021-yilning yozida Shavkat Mirziyoyev Qashqadaryoga tashrifi davomida uy sovg‘a qilgan talaba kelin davlat rahbariga maktub yo‘llagandi.
Izoh (0)