Shavkat Mirziyoyev Bolalar gematologiyasi, onkologiyasi va klinik immunologiyasi markaziga tashrif buyurdi (video)

Shavkat Mirziyoyev 17-iyun kuni yangi Bolalar gematologiyasi, onkologiyasi va klinik immunologiyasi markazini borib ko‘rdi. Bu haqda prezident matbuot kotibi xabar qildi.

Qayd etilishicha, davlat rahbari poyabzaliga himoya jildlari va egniga oq xalat kiyib, markazdagi sharoitlar bilan tanishuvni boshlagan.

Markaz shifokorlari prezidentga sohaga qaratilayotgan e’tibor berayotgan samaralar, yaratilgan sharoitlardan taassurotlari haqida so‘zlab bergan.

“Bunaqa o‘zgarishlar bo‘lishini hech ham kutmagandik, tush ko‘rayotgandekman. Hamma sharoitlar bor, keng, yorug‘. Har bir bemorimiz uchun o‘zining shaxsiy palatasi, korovati, shaxsiy gigiyenik vositalari bor. Juda ham minnatdormiz”, — deydi shifokorlardan biri.

Davlat rahbari markazda davolanayotgan bolalar va ularning ota-onalari bilan suhbatlashgan.

Jumladan, bemor Saidazizxon bilan muloqotda bo‘lgan Shavkat Mirziyoyev uning Prezident maktabida o‘qish istagini inobatga olib, imtihonlarsiz o‘qishga kiritishini aytgan: “Transplantatsiya o‘tganidan keyin o‘zim bu yigitni Prezident maktabiga imtihonsiz o‘qishga kiritaman”.

Bundan tashqari, davlat rahbari markazda ijod bilan shug‘ullanish uchun yaratilgan sharoitlar bilan tanishib, bolalarning mashg‘ulotlarini kuzatgan.

Alan ismli bemor bola prezidentga orzusini aytib bergan: “Tesla zavodining boshlig‘i bo‘lishni xohlayman”. Shavkat Mirziyoyev unga javoban hozirda bola yashaydigan hudud — Qoraqalpog‘iston rivojlanayotganini, u katta bo‘lguncha Tesla ham kirib kelishini aytgan.

Davlat rahbari shifoxonani ko‘zdan kechirgach, onkogematologik yordam sohasida amalga oshirilayotgan ishlar va erishilgan natijalar, onalik va bolalik muhofazasini yanada takomillashtirish hamda tibbiyot xodimlari bilan o‘tkazilgan muloqotda berilgan topshiriqlar ijrosining borishi yuzasidan yig‘ilish o‘tkazadi.