Президент Шавкат Мирзиёев Болалар гематологияси, онкологияси ва клиник иммунологияси марказига ташриф буюрганида, у ерда даволанаётган болалар давлат раҳбарига йўллаган мактубларни олган эди. «Ҳаммасини ўқиб, албатта, жавоб бераман», — деган эди президент. Давлат раҳбари матбуот котибининг ёзишича, жавоб хатлари ўз манзилларига етиб борди. Улардан бири — ховослик Одинахонга йўлланган президент мактубини Сирдарё вилояти ҳокими етказган ва ўқиб берган.
Маълум қилинишича, Ховос туманининг «Ховособод» маҳалласида истиқомат қилаётган Одинахон Абдулҳамидова эндигина 12 ёшни қарши олган. У Республика Болалар гематологияси, онкологияси ва клиник иммунологияси марказида 4 ёшидан буён даволаниб келади.
Одинахон президентга йўллаган мактубида ўзи ва бошқа даволанаётган болалар номидан, касалликдан азият чекаётган болаларни соғлиғини тиклаш, уларга намунали тиббий хизмат кўрсатиш мақсадида яратилган шарт-шароит учун давлат раҳбарига ўз ташаккурини изҳор этиб, болаларча беғубор истакларини билдирган. Мусиқа ва расмга қизиқишини, рус тилини мукаммал ўрганиши ва келажакда шифокор бўлиши учун компьютер совға қилишларини сўраган.
30 июль куни эрта тонгдан вилоят ҳокими Ғофуржон Мирзаев бошчилигидаги бир гуруҳ фаоллар унинг хонадонида бўлиб, Шавкат Мирзиёевнинг жавоб мактуби ва совғасини топширган. Шу билан бирга унга ўқув қуроллари ва дарсликлар, қўшимча совғалар ҳам туҳфа этилган.
Президент мактубида, жумладан, шундай дейилади:
Қадрли Одинахон қизим!Хатингни ўқиб, бугунги кунда мамлакатимиз болалари нақадар беғубор орзу-интилишлар билан яшаётганини яна бир бор чин юракдан ҳис этдим.
Келажакда ошпаз бўлмоқчи эканинг, «Меҳрли мактаб»да мусиқа ва расм чизишни ёқтириб қолганинг ҳақида ёзибсан.
Тил ўрганишга иштиёқинг баландлигини билиб, янада хурсанд бўлдим.
Ахир, биз орзу қилган баркамол авлод мана шундай замонавий билим ва касб-ҳунарларни эгаллайдиган ёш ўғил-қизлардан ташкил топади!
Ишончим комил, юксак интилиш ва тиришқоқлик билан ўз мақсад муддаоларингга албатта етасан. Бу йўлда сенга совға қилинаётган компьютер ҳам ёрдам беради, деб ўйлайман.
Дилингдаги эзгу орзу-ниятларинг доимо сенга ҳамроҳ бўлсин, дейилади жавоб мактубида.
Эслатиб ўтамиз, 2021 йилнинг ёзида Шавкат Мирзиёев Қашқадарёга ташрифи давомида уй совға қилган талаба келин давлат раҳбарига мактуб йўллаганди.
Изоҳ (0)