O‘zbekistonda kripto-aktivlar mayningini ro‘yxatdan o‘tkazish tartibi to‘g‘risidagi nizom loyihasi e’lon qilindi

Istiqbolli loyihalar milliy agentligi “Kripto-aktivlar mayningini ro‘yxatdan o‘tkazish tartibi to‘g‘risidagi nizomni tasdiqlash to‘g‘risida”gi idoralararo buyruq loyihasini muhokamaga qo‘ydi.

Hujjat loyihasiga ko‘ra, mayning faqat yuridik shaxs tomonidan quyosh fotoelektr stansiyalari orqali ishlab chiqarilgan elektr energiyasidan foydalangan holda amalga oshiriladi. Mayning ro‘yxatga oluvchi organ tomonidan majburiy ro‘yxatdan o‘tkaziladi va litsenziyalanadigan faoliyat turiga kirmaydi.

Yuridik shaxs tomonidan, mayningni amalga oshirish huquqi sertifikat berilgan vaqtdan boshlab vujudga keladi. Sertifikatning amal qilish muddati bir yilni tashkil etadi, maynerlar elektron reyestrda ro‘yxatdan o‘tishlari shart.

Maynerlar, mayningni barqarorligini ta’minlash maqsadida, iste’mol qilingan elektr energiyasining hisobini yuritish uchun alohida hisoblagich o‘rnatgan holda yagona elektr energetika tizimiga, faqatgina:

• tig‘iz davr — kechki maksimum (soat 17:00 dan 22:00 gacha) — Vazirlar Mahkamasi tomonidan belgilanadigan ustamalarni inobatga olgan holda belgilanadigan tegishli tariflar asosida;
• tungi davr — sutkaning qorong‘i davri (soat 22:00 dan 00:00 gacha va soat 00:00 dan 06:00 gacha) – belgilangan tarifga nisbatan ikki barobar o‘suvchi koeffitsiyentni qo‘llash asosida ulanish huquqiga ega.

O‘zbekiston hududida yashirin mayningni amalga oshirish, anonim kripto-aktivlar mayningi, ro‘yxatga olingan paytda ko‘rsatilgan manzilga mos kelmaydigan manzilda mayningni amalga oshirish, mayningni sertifikatni olmagan holda amalga oshirish taqiqlanadi.

Quyidagilar mayningni amalga oshirish uchun ruxsat berish talablari va shartlari hisoblanadi:

• elektr energiyasini ishlab chiqarishga tayyor bo‘lgan, o‘rnatilgan va ishga yaroqli quyosh fotoelektr stansiyalarining tasarrufida mavjudligi;
• mayning uskunalarini o‘rnatish uchun mo‘ljallangan alohida joyning mavjudligi;
• O‘zbekistonning kripto-aktivlar aylanmasi sohasidagi qonunchilik talablariga rioya qilish;
• faoliyatni faqat ro‘yxatga olingan paytda ko‘rsatilgan manzilda amalga oshirish.

Sertifikat olish uchun, talabgor, elektron reyestrga Yagona identifikatsiya tizimi (OneID) orqali kirib, arizani real vaqt rejimida quyidagi ma’lumotlarni va hujjatlarni taqdim etgan holda to‘ldiradi:

• soliq to‘lovchining identifikatsiya raqami (STIR);
• tashkiliy-huquqiy shakli ko‘rsatilgan to‘liq firma nomi;
• to‘liq pochta manzili, telefon raqami, elektron pochta manzili;
• mayning uskunalarini o‘rnatish uchun mo‘ljallangan joyning manzili.

Ro‘yxatga oluvchi organ tomonidan sertifikat olish uchun taqdim etilgan ma’lumotlar va hujjatlarni ko‘rib chiqish uchun yig‘im undirilmaydi. Sertifikat berish yoki berishni rad etish to‘g‘risidagi qaror elektron reyestrda arizani barcha zarur ma’lumotlarni va hujjatlarni taqdim etgan holda to‘ldirilgan kundan boshlab yigirma kundan oshmaydigan muddatda qabul qilinadi.Sertifikat 12 oy muddat amal qiladi, shundan so‘ng uni uzaytirish uchun yana shuncha mablag‘ to‘lash kerak bo‘ladi. Yig‘im puli to‘lanmasa sertifikatning amal qilinishi to‘xtatiladi.