Gollivud yulduzi Jonni Depp “Karib dengizi qaroqchilari” filmining 6-qismida ham Jek Chittak rolini ijro etishi mumkin. Bu haqda Poptopic tabloidi o‘z manbalariga tayanib xabar berdi.
Tasdiqlanmagan ma’lumotlarga ko‘ra, 59 yoshli aktyor hozirda Disney bilan muzokaralar o‘tkazish bosqichida. Kompaniya Deppni kinofranshizadan chetlatgani uchun rasman kechirim so‘rab, kelajakdagi loyiha uchun unga 301 million dollar taklif qilishga tayyorlanmoqda. Studiya, shuningdek, aktyor qo‘llab-quvvatlashni istagan xayriya tashkilotga katta miqdorda ehsonni amalga oshirish niyatida.
Ta’kidlanishicha, Disney hozirda Jek Chittak ishtirokidagi yangi “Karib dengizi qaroqchilari”ning qoralama ssenariysini tayyorlab qo‘ygan va Depp kinostudiyani kechirib, ularning taklifini qabul qilishiga umid bildirishmoqda. Bundan tashqari, kompaniya Jonni Depp ishtirokida “Qora marvarid” kapitanining yoshligi haqida serial suratga olishni rejalashtirgan.
Avvalroq Disney kompaniyasi Deppni Xyord bilan mojarosi sabab “Karib dengizi qaroqchilari”ning yangi qismidan chetlashtirgan edi. Ayol sobiq erini oiladagi zo‘ravonlikda ayblagan. Jonni Depp sobiq rafiqasi bilan sud jarayonida 300 million dollar va millionta alpaka uchun ham “Karib dengizi qaroqchilari”dagi Jek Chittak roliga qaytmasligini ma’lum qilgandi. Sud yakunlariga ko‘ra, Depp oqlanib, Ember unga 15 million dollar tovon puli to‘lashi kerakligi haqida qaror chiqargan.
Mavzuga doir:
- Jonni Depp va Ember Xyordning Los-Anjelesdagi pentxausi sotuvga qo‘yildi (foto)
- “Jonni — hammaning sevimli qahramoni, odamlar ham uni bilamiz, deb o‘ylaydi”. Ember Xyord ilk bor sud haqida so‘zlab berdi
- Ember Xyord bor haqiqatni aytish uchun Jonni Depp bilan janjalga boy bo‘lgan nikohi haqida kitob yozishga qaror qildi
Izoh (0)