Голливуд юлдузи Жонни Депп «Кариб денгизи қароқчилари» фильмининг 6-қисмида ҳам Жек Читтак ролини ижро этиши мумкин. Бу ҳақда Poptopic таблоиди ўз манбаларига таяниб хабар берди.
Тасдиқланмаган маълумотларга кўра, 59 ёшли актёр ҳозирда Disney билан музокаралар ўтказиш босқичида. Компания Деппни кинофраншизадан четлатгани учун расман кечирим сўраб, келажакдаги лойиҳа учун унга 301 миллион доллар таклиф қилишга тайёрланмоқда. Студия, шунингдек, актёр қўллаб-қувватлашни истаган хайрия ташкилотга катта миқдорда эҳсонни амалга ошириш ниятида.
Таъкидланишича, Disney ҳозирда Жек Читтак иштирокидаги янги «Кариб денгизи қароқчилари»нинг қоралама сценарийсини тайёрлаб қўйган ва Депп киностудияни кечириб, уларнинг таклифини қабул қилишига умид билдиришмоқда. Бундан ташқари, компания Жонни Депп иштирокида «Қора марварид» капитанининг ёшлиги ҳақида сериал суратга олишни режалаштирган.
Аввалроқ Disney компанияси Деппни Хёрд билан можароси сабаб «Кариб денгизи қароқчилари»нинг янги қисмидан четлаштирган эди. Аёл собиқ эрини оиладаги зўравонликда айблаган. Жонни Депп собиқ рафиқаси билан суд жараёнида 300 миллион доллар ва миллионта алпака учун ҳам «Кариб денгизи қароқчилари»даги Жек Читтак ролига қайтмаслигини маълум қилганди. Суд якунларига кўра, Депп оқланиб, Эмбер унга 15 миллион доллар товон пули тўлаши кераклиги ҳақида қарор чиқарган.
Мавзуга доир:
- Жонни Депп ва Эмбер Хёрднинг Лос-Анжелесдаги пентхауси сотувга қўйилди (фото)
- «Жонни — ҳамманинг севимли қаҳрамони, одамлар ҳам уни биламиз, деб ўйлайди». Эмбер Хёрд илк бор суд ҳақида сўзлаб берди
- Эмбер Хёрд бор ҳақиқатни айтиш учун Жонни Депп билан жанжалга бой бўлган никоҳи ҳақида китоб ёзишга қарор қилди
Изоҳ (0)