Тошкент шаҳрида 27 июнь куни ноқонуний муомаладан мусодара қилинган 1 тонна 933 кг 695 гр гиёҳвандлик воситасини йўқ қилиш тадбири ўтказилди. Бу ҳақда «Дарё» мухбири хабар бермоқда.
Давлат хавфсизлик хизмати томонидан ташкил этилган тадбирда бугунги кунда дунёдаги нарковазият, гиёҳвандлик воситаларини аниқлаш ва йўқ қилиш борасида бажарилаётган ишлар тўғрисида маълумот берилди. Вазирлар Маҳкамаси ҳузуридаги Наркотик моддаларни назорат қилиш миллий ахборот – таҳлил маркази халқаро бўлим бошлиғи Шерзод Арабовнинг айтишича, минтақадаги вазият мураккаблигича қолмоқда.
«Республикамизда ва умуман минтақада нарковазият жиддийлигича қолмоқда. Бунинг сабабларидан бири кейинги йилларда янги турдаги синтетик гиёҳвандлик воситалари ва янги турдаги психфаол моддаларнинг тарқалиб бориши ҳисобланади. Бундан ташқари, интернет макони - даркнет орқали ҳам бундай моддалар кенг тарғиб қилиниши ва муомалада бўлиши вазиятни мураккаблаштирмоқда. Шунингдек, Ўзбекистон ўзининг географик жойлашуви ва ривожланган транспорт инфратузилмасига кўра глобал наркотрафиклардан бири – шимолий йўлакча бўйлаб транзит мамлакат ҳисобланади. Шу нуқтаи назардан сўнги йилларда ҳуқуқ - тартибот идоралари томонидан биринчи навбатда чегара ўтказиш пунктлари салоҳиятини муҳтаҳкамалаш, уларнинг моддий-техник базасини яхшилаш масалаларида хорижий шерикларимиз билан биргаликда ишлар олиб боряпмиз. Хусусан, соҳа ходимлари малакасини ошириб боряпмиз.
Наркотикларни аниқлаш кўпроқ чегара ҳудудлари ҳиссасига тўғри келмоқда. Жумладан, Афғонистон, қўшни Тожикистон ва Қирғизистон билан чегара ҳудудларда катта миқдордаги наркотик моддаларни мусодара қилиш ҳолатларига гувоҳи бўляпмиз», – деди марказ масъули.
Шерзод Арабовнинг таъкидлашича, сўнги вақтда Ўзбекистонда наркожиноятлар сони ортиб бормоқда.
«2021 йилда жами 7 минг 142 та наркожиноятлар фош қилинган. Яъни кўрсатгичлар ўтган йилга нибатан 18,4 фоизга ошган. Бунда энг хавотирли масала, ёшларнинг наркожиноятларга аралашиш салмоғи йилдан йилга ортиб бормоқда. Хусусан, Тошкент шаҳрида наркожиноятлар бўйича судланган фуқароларнинг ҳар икки нафаридан бири ёшлар бўлиб чиқяпти. Бу ҳолат бизни албатт,а жиддий хавотирга солиб келимоқда», - деди у.
Маълумот учун, Ўзбекистонда гиёҳвандликка қарши курашиш бўйича бир қатор қонун ҳужжатлари амал қилмоқда. Жумладан, республика 1995 йилнинг февраль ойида БМТнинг гиёҳвандлик воситалари ва психотроп моддаларнинг ноқонуний муомаласига қарши кураш тўғрисидаги 1961, 1971 ва 1988 йиллардаги конвенцияларига қўшилган. Мамлакатда 1999 йил 19 август куни «Гиёҳвандлик воситалари ва психотроп моддалар тўғрисида»ги қонун қабул қилинган. 2021 йил январь ойидан бошлаб наркология соҳасидаги муносабатларни тартибга солувчи «Наркологик касалликлар профилактикаси ва даволаш тўғрисида»ги қонун кучга кирган.
Изоҳ (0)