Ташқи ишлар вазири ўринбосари Фурқат Сиддиқов 23 июнь куни Туркманистоннинг Ўзбекистондаги фавқулодда ва мухтор элчиси Ёзқули Маммедов билан учрашди. Бу ҳақда ТИВ ахборот хизмати хабар қилди.
Қайд этилишича, учрашувда Ўзбекистон—Туркманистон яхши қўшничилик ва стратегик шериклик муносабатларини ривожлантириш, шунингдек, олий ва юқори даражадаги бўлажак тадбирларга тайёргарликка доир долзарб масалалар муҳокама қилинган. Маммедов Ўзбекистон томонига элчихона фаолиятини барча йўналишларида қўллаб-қувватлаётгани, жумладан, Туркманистонга турли даражадаги ташрифларни ташкил этиш борасида доимий ёрдам учун миннатдорлик билдирган.
Томонлар ўзаро манфаатли ҳамкорликни кенгайтириш, савдо-иқтисодий, транспорт-транзит, гуманитар ва бошқа соҳаларда истиқболли лойиҳа ва дастурларни биргаликда амалга ошириш муҳимлигини таъкидлаган.
Минтақавий ва халқаро хавфсизликнинг долзарб масалалари юзасидан фикр алмашилган.
Бундан ташқари, шу куни Фурқат Сиддиқов Қирғизистоннинг мамлакатдаги фавқулодда ва мухтор элчиси Муса Жаманбаев билан ҳам учрашув ўтказган. Унда икки томонлама ҳамкорликни ривожлантириш ҳамда бўлажак олий ва юқори даражадаги тадбирларга тайёргарлик кўриш масалалари муҳокама қилинган.
Томонлар икки мамлакат президентларининг шахсий алоқалари туфайли Ўзбекистон—Қирғизистон муносабатлари сифат жиҳатидан янги босқичга кўтарилганини таъкидлаган.
Савдо, саноат кооперацияси, қишлоқ хўжалиги ва маданият соҳаларидаги икки томонлама муносабатларни жадаллаштириш масалаларига эътибор қаратилган. Шунингдек, минтақавий ва халқаро аҳамиятга молик долзарб масалалар юзасидан ҳам фикр алмашилган.
Изоҳ (0)