Samarqandda 1 million 500 ming dollar miqdoridagi kredit qarzdorligi bor tadbirkorning mol-mulklari va transportlariga nisbatan qidiruv e’lon qilindi. Bu haqda “Daryo”ga MIBning viloyat boshqarmasi qidiruv sho‘basi inspektori Firdavs Mahmudov ma’lum qildi.
Ta’kidlanishicha, Toyloq tuman iqtisodiy sudining 2021-yil 27-avgustdagi ijro hujjatiga asosan qarzdor “Daromad omad fayz” qo‘shma korxonasidan AT “Asakabank” viloyat filiali foydasiga 1 million 349 ming 904 dollar asosiy kredit qarzi, 149 ming 989 dollar muddati o‘tgan qarz, 927 dollar foiz qarz, jami 1 million 500 ming 820 dollar (17 milliard 3 million 370 ming so‘mni) undirish to‘g‘risidagi ijro hujjati Byuroning viloyat boshqarmasi ish yurituviga kelib tushgan.
Undiruv uchun garovga qo‘yilgan sanoat zonada joylashgan eshik-deraza profillari ishlab chiqarishga mo‘ljallangan uskuna, sabzavot mahsulotlari ishlab chiqarishga mo‘ljallangan issiqxona majmuasi va maxsus avtotransport vositalariga qaratish belgilangan.
Qarzdor tomonidan kredit qarzdorligi muddatida qoplanmagach, majburiy ijro harakatlariga kirishilgan. Xususan, maxsus avtotransport vositalariga nisbatan boshqarmaning qidiruv bo‘limi tomonidan qidiruv e’lon qilingan.
Qidiruv natijasida Doosan rusumli ekskavator maxsus transporti Jomboy tumani hududida ishlayotgan joyda topilib, vaqtinchalik saqlash uchun jarima maydonchasiga qo‘yilgan.
“Endilikda qarzdorlik bartaraf etilmasa, bu transport auksionga chiqariladi va tushgan mablag‘ kreditni qoplashga yo‘naltiriladi”, — deydi Firdavs Mahmudov.
Izoh (0)