Davlat xavfsizlik xizmati Sirdaryoda “Obod qishloq” quraman deb 1,5 milliard so‘mdan ortiq mablag‘ni o‘zlashtirgan mansabdorlarni aniqladi, deb xabar beradi O‘zA.
Ma’lum qilinishicha, DXX 2020—2021-yillarda Boyovut tumani yo‘llardan foydalanish unitar korxonasi tomonidan tumandagi umumfoydalanuv avtomobil yo‘llari va “Obod qishloq” dasturiga asosan ichki yo‘llarda amalga oshirilgan qayta ta’mirlash ishlari nazorat o‘lchovidan o‘tkazilgan.
Tekshiruv davomida mazkur korxona mansabdor shaxslari o‘zaro til biriktirib, hisobotlarga bajarilmagan ishlarni qo‘shib yozish orqali jami 1 milliard 525 million so‘m miqdoridagi budjet mablag‘larini rastrata qilish yo‘li bilan talon-toroj qilganliklari ma’lum bo‘lgan.
Eslatib o‘tamiz, 2021-yilda prezidentining “‘Obod qishloq’ va ‘Obod mahalla’ dasturlarini amalga oshirish bo‘yicha qo‘shimcha chora-tadbirlar to‘g‘risida”gi qaroriga ko‘ra, O‘zbekistonda 8 mingga yaqin qishloq va mahallada qurilish-ta’mirlash ishlari amalga oshirilishi kerak edi. May oyida “Obod qishloq” va “Obod mahalla” doirasidagi ishlar sifatsiz olib borilayotgani haqida Bosh prokuraturaga murojaat qilish bo‘yicha yangi tizim ishga tushirilgandi.
Izoh (0)