17—18 июнь кунлари Қозоғистоннинг Туркистон шаҳрига журналист ва блогерлар учун Туризм вазирлиги томонидан инфотур ташкил этилди. «Дарё» мухбири Туркистон вилоятида бўлиб, шаҳарнинг диққатга сазовор жойларидан фоторепортаж тайёрлади.
Туристик шаҳарчага айлантирилган Карвон сарой мажмуаси объектлари 20 гектардан ошиқ бўлиб, тарих ва замонавийликни мужассамлаштира олган. Шунингдек, бу ерга келган одамнинг эътиборини сув ҳавзаси тортиши табиий. Бир қарашда Италиянинг Венеция шаҳрига ҳам ўхшаб кетади.
Туркистон шаҳрида жойлашган Хўжа Аҳмад Яссавий меъморий мажмуаси. Ёдгорлик Амир Темур буйруғига асосан 1385–1405 йилларда қурилган бўлиб, бу ерга ҳозирда зиёрат учун йилига 1 миллиондан ортиқ хориждан туристлар ва маҳаллий аҳоли ташриф буюради.
Туркистондан 50 км наридаги Сауран шаҳарчаси. Тарихда Оқ Ўрданинг пойтахти бўлган. XIII-ХВ асрларда шаҳар ривожланиб, одамлар фаол ҳаёт кечирган. Ҳозир эса объект давлат ҳимоясига олинган ва музейга айлантирилган.
Кейинги манзил «Олтин Семурғ» учар кинотеатри ва «Ули Дала Эли» музейи. Кинотеатрда қозоқ маданиятининг келиб чиқиши ҳақидаги фильмни замонавий 8Д форматда томоша қилиш мумкин. Музейда эса Қозоғистон тарихига оид экспонатлар сақланади. Ушбу экспонатлар илмий асосланган материаллар, ҳақиқий археологик топилмалар асосида қайта тикланган.
Туркий дунё залида 2 000 квадрат метр майдонга эга кўп функцияли экран мавжуд ва унда туркий халқалар тарихи ҳамда уларнинг инсоният цивилизацияси тараққиётидаги ўрни ҳақидаги фильм намойиш этилади.
Сув устида тунги Карвон сарой мажмуаси бўйлаб қайиқларда сайр қилиш имконияти мавжуд. Бундан ташқари, мусиқали фавворалар шоуси ҳамда тарихий қаҳрамонлар образидаги театрлаштирилган парадлар ҳам бўлиб ўтади.
Изоҳ (0)